മുസ്‌ലിംലീഗ് മതേതര പാര്‍ട്ടി: കുഞ്ഞാലിക്കുട്ടി

കോഴിക്കോട്: മുസ് ലിംലീഗ് വൈറസാണെന്ന യോഗി ആദിത്യനാഥിന്റെ പ്രസ്താവനക്ക് മറുപടിയുമായി മുസ് ലിംലീഗ് നേതാവ് പി കെ കുഞ്ഞാലിക്കുട്ടി. മുസ് ലിംലീഗ് മതേതര പാര്‍ട്ടിയാണെന്നും യോഗി ആദിത്യനാഥ് അറിവില്ലാതെയാണ് ഇത്തരം പരാമര്‍ശങ്ങള്‍ നടത്തുന്നതെന്നും കുഞ്ഞാലിക്കുട്ടി പറഞ്ഞു. യോഗി ആദ്യമായിട്ടല്ല ഇത്തരം വര്‍ഗീയ പരാമര്‍ശങ്ങള്‍ നടത്തുന്നത്. പ്രസ്താവന യോഗിക്ക് തന്നെ തിരിച്ചടിയാകും. രാഹുല്‍ ഗാന്ധിയുടെ മുന്നേറ്റം കണ്ട് വിളറിപിടിച്ചാണ് യോഗി ഇത്തരം പ്രസ്താവനകള്‍ നടത്തുന്നതെന്നും കുഞ്ഞാലിക്കുട്ടി പറഞ്ഞു. കേരളത്തിലും കേന്ദ്രത്തിലും ഇക്കൂട്ടര്‍ക്ക് പച്ചക്കൊടിക്കാരുമായി സഖ്യമുണ്ടെന്ന കാര്യം മറക്കരുതെന്നും അദ്ദേഹം പറഞ്ഞു.

'തങ്ങളുടെ പെര്‍ഫോമന്‍സ് പറഞ്ഞ് വോട്ട് പിടിക്കാന്‍ കഴിയാത്തത് കൊണ്ടാണ് ഇത്തരം നോണ്‍ ഇഷ്യൂകള്‍ ചര്‍ച്ചയാക്കുന്നത്. പ്രളയം മൂലം നിസ്സഹായരായ കേരള ജനതയെ കൈ വിട്ടവരാണ് കേന്ദ്ര സര്‍ക്കാര്‍'. കുഞ്ഞാലിക്കുട്ടി പറഞ്ഞു.