ഗ്യാസ് ലോറിയില്‍ തീ കൊളുത്താന്‍ ശ്രമം; യുവാവ് പിടിയില്‍

കോട്ടയം: കോട്ടയത്ത് റോഡരികില്‍ പാര്‍ക്ക് ചെയ്തിരുന്ന ഗ്യാസ് ലോറിയില്‍ കയറി തീ കൊളുത്താന്‍ ശ്രമിച്ച യുവാവ് അറസ്റ്റില്‍. കസ്റ്റഡിയിലെടുത്ത യുവാവിന് മാനസിക പ്രശ്‌നങ്ങളുണ്ടെന്ന് പോലിസ് പറഞ്ഞു. തലയോലപ്പറമ്പ് വെട്ടിക്കാട്ട് മുക്കില്‍ ഇന്നലെ അര്‍ധരാത്രിയോടെയായിരുന്നു സംഭവം

വാഹനം നിര്‍ത്തി ഡ്രൈവര്‍ വീട്ടിലേക്ക് പോയതിന് പിന്നാലെ വാഹനത്തില്‍ അതിക്രമിച്ചുകയറുകയായിരുന്നു. യുവാവ് കൈയില്‍ കരുതിയ കമ്പി ഉപയോഗിച്ച് ഗ്യാസ് സിലിണ്ടര്‍ കുത്തിത്തുറന്ന ശേഷം തീ കൊളുത്തി. ആ സമയത്ത് സമീപത്തുണ്ടായിരുന്ന ഓട്ടോ ഡ്രൈവര്‍മാര്‍ ഇടപെട്ടു പിടിച്ചുമാറ്റിയതിനാല്‍ വന്‍ അപകടം ഒഴിവായി. ലോറിയില്‍ പൂര്‍ണമായും ഗ്യാസ് സിലിണ്ടറുകള്‍ നിറച്ച നിലയിലായിരുന്നു. തീ പടര്‍ന്നതിനെ തുടര്‍ന്ന് കടുത്തുരുത്തിയില്‍ നിന്ന് എത്തിച്ച ഫയര്‍ഫോഴ്‌സ് സംഘം തീ നിയന്ത്രണ വിധേയമാക്കി. സംഭവത്തില്‍ പോലിസ് അന്വേഷണം ആരംഭിച്ചു.