കൊല്ലത്ത് 75 ഗ്രാം എംഡിഎംഎയുമായി യുവതി അറസ്റ്റില്‍

കൊല്ലം: നഗരത്തില്‍ 75 ഗ്രാം എംഡിഎംഎ കച്ചവടവുമായി ബന്ധപ്പെട്ട് ഹരിത (27) എന്ന യുവതിയെ കൊല്ലം വെസ്റ്റ് പോലിസ് അറസ്റ്റ് ചെയ്തു. മാങ്ങാട് സ്വദേശിയായിരുന്ന ഹരിത, ഒമാനില്‍ നിന്നുള്ള എംഡിഎംഎ കച്ചവടത്തിന്റെ മുഖ്യ ഏജന്റാണ്. ഇതോടെ കേസിലെ അറസ്റ്റിലായവരുടെ എണ്ണം നാലായി.

ആഗസ്റ്റ് 24ന്, പുന്തലത്താഴം സ്വദേശി അഖില്‍ ശശിധരനെ 75 ഗ്രാം എംഡിഎംഎയുമായി സിറ്റി ഡാന്‍സാഫും വെസ്റ്റ് പോലിസും ചേര്‍ന്ന് പിടികൂടിയിരുന്നു. അഖിലിനെ ചോദ്യം ചെയ്യുമ്പോഴാണ് നഗരത്തിലെ വ്യാപക ലഹരി ശൃംഖലയുടെ വിവരങ്ങള്‍ പുറത്തു വന്നത്. അതേസമയം, എംഡിഎംഎ വാങ്ങാന്‍ എത്തിയ അവിനാശിനെയും, വിതരണത്തിനിടയില്‍ ശരത്തിനെയും പോലിസ് പിടികൂടിയിരുന്നു. ഇവരില്‍ നിന്നുള്ള വിവരങ്ങളാണ് ഹരിതയുടെ ഇടപെടല്‍ തെളിയിച്ചത്.

2024 ഡിസംബറില്‍ 2 ഗ്രാം എംഡിഎംഎയുമായി ഹരിതയും മറ്റുള്ളവരും എറണാകുളത്ത് സെന്‍ട്രല്‍ പോലിസിന്റെ പിടിയിലായിരുന്നെങ്കിലും, 2025 ജനുവരിയില്‍ ജാമ്യത്തില്‍ പുറത്തുവന്ന ശേഷം ഒമാനില്‍ പോയി, അതില്‍ നിന്നും കച്ചവടത്തിന്റെ ഏജന്റായി പ്രവര്‍ത്തിക്കുകയായിരുന്നു. ഹരിതയുടെ ഫോണ്‍ പരിശോധനയില്‍ നിരവധി ലഹരി ഇടപാടുകളുടെ തെളിവുകള്‍ കണ്ടെത്തിയതായി പോലിസ് അറിയിച്ചു.