സ്ലാബ് തകര്‍ന്ന് കുഴിയില്‍ വീണ് വയോധികന് ദാരുണാന്ത്യം

തിരുവനന്തപുരം: കോണ്‍ക്രീറ്റ് സ്ലാബ് പൊട്ടി കുഴിയില്‍ വീണ് വയോധികന് ദാരുണാന്ത്യം. തിരുവനന്തപുരം മുക്കോലയ്ക്കല്‍ ഷിജു ഭവനില്‍ സോമന്‍(63) ആണ് മരിച്ചത്. തിരുവനന്തപുരം ആര്യനാട് കുളപ്പടയിലാണ് സംഭവം. നടന്നുപോവുന്നതിനിടെ തോടിന് കുറുകെയായി സ്ഥാപിച്ചിട്ടുള്ള കോണ്‍ക്രീറ്റ് സ്ലാബ് പൊട്ടി വീഴുകയായിരുന്നു. സ്ലാബ് തകര്‍ന്നതോടെ സോമനും കുഴിയില്‍ വീണു. സോമന്റെ ദേഹത്തേക്ക് തകര്‍ന്ന സ്ലാബ് വീണു. പൊട്ടിയ സ്ലാബിനും കുഴിക്കും ഇടയിലായി സോമന്‍ ഞെരിഞ്ഞമര്‍ന്നുപോവുകയായിരുന്നു. സ്ലാബിന്റെ ഭാഗങ്ങള്‍ വീണ് തലയ്ക്കും മറ്റു ഭാഗങ്ങളിലും ഗുരുതരമായി പരിക്കേറ്റാണ് മരിച്ചത്. പോലിസും നാട്ടുകാരുമെത്തി സ്ലാബ് നീക്കിയശേഷം സോമനെ പുറത്തെടുത്തെങ്കിലും രക്ഷിക്കാനായില്ല. റബ്ബര്‍ ടാപ്പിങിന് പോയശേഷം തിരികെ വീട്ടിലേക്ക് പോവുന്ന വഴിയിലാണ് അപകടമുണ്ടായത്.