മുല്ലപ്പെരിയാറിലെ ജലനിരപ്പ് ഉയര്‍ന്നു; മുന്നറിയിപ്പ് നല്‍കി തമിഴ്നാട്

കുമളി: മുല്ലപ്പെരിയാര്‍ അണക്കെട്ടിലെ ജലനിരപ്പ് 140 അടിയായി ഉയര്‍ന്നു. അണക്കെട്ടിന്റെ വൃഷ്ടി പ്രദേശത്ത് ശക്തമായ മഴ പെയ്തിരുന്നു. ഡാമിലേക്കുള്ള നീരൊഴുക്കും ശക്തമായിരുന്നു. ഇതിനു പിന്നാലെയാണ് 140 അടിയായി ജലനിരപ്പ് ഉയര്‍ന്നുവെന്ന മുന്നറിയിപ്പ് തമിഴ്നാട് നല്‍കിയത്. അണക്കെട്ടില്‍ മുന്‍വര്‍ഷത്തേക്കാള്‍ 17.25 അടി വെള്ളം അധികമുണ്ട്. തിങ്കളാഴ്ച രാവിലെ ആറിന് ജലനിരപ്പ് 138.65 അടിയെത്തി. മഴ പെയ്തതോടെ തിങ്കളാഴ്ച രാത്രി 140 അടിയായി ഉയര്‍ന്നു. വ്യാഴാഴ്ച മുതല്‍ മുല്ലപ്പെരിയാറില്‍ നിന്നും വെള്ളമെടുക്കുന്നത് തമിഴ്‌നാട് നിര്‍ത്തിയിരുന്നു. എന്നാല്‍ മഴ തുടരുകയും ജലനിരപ്പ് ഉയരുകയും ചെയ്തതോടെ ഞായറാഴ്ച മുതല്‍ വീണ്ടും വെള്ളമെടുത്തു തുടങ്ങി.

റൂള്‍ കര്‍വു പ്രകാരം 142 അടിയാണ് പരമാവധി സംഭരിക്കാവുന്നത്. ഈ മാസം 30നാണ് റൂള്‍ കര്‍വു പരിധി അവസാനിക്കുന്നത്. 142 അടിയാണ് ഡാമിന്റെ പരമാവധി സംഭരണ ശേഷി. ആ ജലനിരപ്പിലേക്ക് നവംബര്‍ മാസം അവസാനത്തോടുകൂടി ജലനിരപ്പെത്തിക്കുന്നത് തമിഴ്നാടിന്റെ പതിവാണ്. അതിന്റെ ഭാഗമായിക്കൂടിയാണ് ഈ ജലനിരപ്പ് ഉയര്‍ന്നത്. തമിഴ്നാട് കൊണ്ടുപോകുന്ന വെള്ളത്തിന്റെ അളവ് കുറച്ചിട്ടുണ്ട്. വരും മണിക്കൂറുകളില്‍ 142 അടിയിലേക്ക് ജലനിരപ്പ് എത്താനുള്ള സാധ്യതയുണ്ട്. നിലവില്‍ ആശങ്കപ്പെടേണ്ട സാഹചര്യമില്ല.