വന്ദേ ഭാരത്: നാലു സര്‍വീസുകളില്‍ മാറ്റം പ്രഖ്യാപിച്ച് റെയില്‍വേ

ന്യൂഡല്‍ഹി: ദക്ഷിണപശ്ചിമ റെയില്‍വേ സോണിന് കീഴിലുള്ള നാലു വന്ദേ ഭാരത് എക്‌സ്പ്രസ് ട്രെയിനുകളുടെ സമയക്രമത്തില്‍ മാറ്റം വരുത്തി റെയില്‍വേ. പുതുക്കിയ സമയം പ്രാബല്യത്തില്‍ വന്നതോടെ യാത്രക്കാര്‍ യാത്രയ്ക്ക് മുന്‍പ് ഔദ്യോഗിക വെബ്‌സൈറ്റ് അല്ലെങ്കില്‍ മൊബൈല്‍ ആപ്പ് പരിശോധിക്കണമെന്ന് അധികൃതര്‍ നിര്‍ദേശിച്ചു.

കാച്ചെഗുഡ-യശ്വന്ത്പൂര്‍ (20703) വന്ദേ ഭാരത് എക്‌സ്പ്രസ് ഇനി മുതല്‍ വൈകുന്നേരം 3:55നു ഹിന്ദുപൂര്‍ സ്‌റ്റേഷനില്‍ എത്തും. മടക്കയാത്രയായ യശ്വന്ത്പൂര്‍-കാച്ചെഗുഡ (20704) സര്‍വീസ് ഉച്ചയ്ക്ക് 12:17നു ഹിന്ദുപൂരില്‍ എത്തിച്ചേരും. കലബുറഗി-എസ്എംവിടി ബെംഗളൂരു (22231) വന്ദേ ഭാരത് എക്‌സ്പ്രസ് ഇനി മുതല്‍ രാവിലെ 11:13നു ശ്രീ സത്യസായി പ്രശാന്തി നിലയത്തില്‍ എത്തും. തുടര്‍ന്ന് യെലഹങ്ക സ്‌റ്റേഷനില്‍ ഉച്ചയ്ക്ക് 12:58നു ട്രെയിന്‍ എത്തിച്ചേരും. അതേസമയം, എസ്എംവിടി ബെംഗളൂരു-കലബുറഗി (22232) മടക്ക സര്‍വീസ് വ്യാഴാഴ്ച ഒഴികെയുള്ള എല്ലാ ദിവസങ്ങളിലും സര്‍വീസ് നടത്തും. യാത്രാ സൗകര്യം മെച്ചപ്പെടുത്തുന്നതിനുള്ള നടപടികളുടെ ഭാഗമായാണ് സമയക്രമത്തില്‍ മാറ്റം വരുത്തിയതെന്ന് റെയില്‍വേ അറിയിച്ചു.