മൈസൂരില്‍ ഹിന്ദുത്വ സംഘടനയുടെ പ്രതിഷേധം റിപോര്‍ട്ട് ചെയ്യാനെത്തിയ ഉറുദു മാധ്യമപ്രവര്‍ത്തകന് മര്‍ദ്ദനം

മൈസൂരു: കര്‍ണാടകയിലെ മൈസൂരില്‍ ഹിന്ദുത്വ സംഘടനയായ ഹിന്ദു ജാഗരന്‍ സമിതിയുടെ പ്രതിഷേധ റാലി റിപോര്‍ട്ട് ചെയ്യാനെത്തിയ ഉറുദു മാധ്യമപ്രവര്‍ത്തകന് മര്‍ദ്ദനം. ഉറുദു മാധ്യമമായ ഡെയ്‌ലി കൗസറിന്റെ ചീഫ് എഡിറ്ററായ മുഹമ്മദ് സഫ്ദര്‍ കൈസറിനെയാണ് കോട്ടെ ആഞ്ജനേയസ്വാമി ക്ഷേത്രത്തിനരികില്‍ വച്ച് ആക്രമിച്ചത്.

ആക്രമിക്കുന്ന വീഡിയോ സാമൂഹികമാധ്യങ്ങളില്‍ വൈറലാണ്.

സംഘടനയുടെ നേതാവ് ജഗദീഷ് കാരന്തിന്റെ പ്രസംഗം പകര്‍ത്തുന്നതിനിടയിലാണ് ആക്രമണം നടന്നത്. പ്രസംഗം റെക്കോര്‍ഡ് ചെയ്യുന്നത് പ്രവര്‍ത്തകര്‍ നിരവധി തവണ തടസ്സപ്പെടുത്തി. അതിനുശേഷമാണ് ആക്രമിച്ചത്. വീഡിയോ ഡിലീറ്റ് ചെയ്യാനും ആവശ്യപ്പെട്ടു.

49 വയസ്സുള്ള കൈസറിനെ പോലിസിന്റെ സാന്നിധ്യത്തിലായിരുന്നു മര്‍ദ്ദിച്ചത്.

മൈസൂരു ജില്ലാ ജേര്‍ണലിസ്റ്റ് അസോസിയേഷന്‍ സംഭവത്തെ അപലപിച്ചു. പത്രപ്രവര്‍ത്തക യൂനിയന്‍ ജില്ലാ പോലിസ് മേധാവിക്ക് പരാതി നല്‍കിയിട്ടുണ്ട്.

ദേവരാജ പോലിസ് സ്‌റ്റേഷനില്‍ കൈസറും പരാതി നല്‍കി.

മാധ്യമപ്രവര്‍ത്തകനെ മര്‍ദ്ദിച്ചതിനെതിരേ എസ്ഡിപിഐ പ്രവര്‍ത്തകര്‍ പ്രതിഷേധിച്ചു.