എറണാകുളം കലക്ടറായി ഉമേഷ് ചുമതലയേറ്റു; യാത്രയയപ്പിന് നില്‍ക്കാതെ രേണു രാജ്

കൊച്ചി: എറണാകുളം ജില്ലാ കലക്ടറായി എന്‍ എസ് കെ ഉമേഷ് ചുമതലയേറ്റു. ബ്രഹ്മപുരത്തെ പ്രശ്‌നത്തിന് ശാശ്വത പരിഹാരം കാണാന്‍ ടീം എറണാകുളമായി എല്ലാവരും ഒറ്റക്കെട്ടായി പ്രവര്‍ത്തിക്കണമെന്ന് കലക്ടര്‍ പറഞ്ഞു. ചാര്‍ജെടുത്തശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പ്രശ്‌നപരിഹാരത്തിന് ജില്ലാ ഭരണകൂടം, കോര്‍പറേഷന്‍, മാധ്യമപ്രവര്‍ത്തകര്‍, ജനപ്രതിനിധികള്‍, പൊതുജനങ്ങള്‍ എന്നിങ്ങനെ എല്ലാവരും ഒരു ടീമായി പ്രവര്‍ത്തിക്കണമെന്നും കലക്ടര്‍ വ്യക്തമാക്കി.

അതേസമയം, ഉമേഷിന് ചുമതല കൈമാറാന്‍ സ്ഥാനമൊഴിഞ്ഞ കലക്ടര്‍ രേണു രാജ് എത്തിയില്ല. കഴിഞ്ഞ ദിവസം തന്നെ എഡിഎമ്മിന് ചുമതല കൈമാറിയ ശേഷം യാത്രയയപ്പിന് നില്‍ക്കാതെ രേണു മടങ്ങി. എന്നാല്‍, ചട്ടമനുസരിച്ച് പുതിയ കലക്ടര്‍ ചാര്‍ജെടുക്കുമ്പോള്‍ നിലവിലെ കലക്ടര്‍ എത്തണമെന്ന് നിര്‍ബന്ധമില്ല.