മലപ്പുറത്ത് യുഡിഎഫ് ആധിപത്യം

മലപ്പറം: മലപ്പുറം ബ്ലോക്ക് പഞ്ചായത്തില്‍ യുഡിഎഫ് ആധിപത്യം. ആകെയുള്ള 15 ബ്ലോക്ക് പഞ്ചായത്തുകളില്‍ 14ഉം യുഡിഎഫ് സ്വന്തമാക്കിയപ്പോള്‍ ഒരൊറ്റ ബ്ലോക്ക് മാത്രം എല്‍ഡിഎഫിനൊപ്പം നിന്നു. പൊന്നാനി ബ്ലോക്ക് പഞ്ചായത്തിലാണ് എല്‍ഡിഎഫ് വിജയിച്ചത്. അരീക്കോട്, കാളികാവ്, കൊണ്ടോട്ടി, കുറ്റിപ്പുറം, മലപ്പുറം, മങ്കട, നിലമ്പൂര്‍, പെരിന്തല്‍മണ്ണ, പെരുമ്പടപ്പ്, താനൂര്‍, തിരൂര്‍, തിരൂരങ്ങാടി, വേങ്ങര, വണ്ടൂര്‍ എന്നീ 14 ബ്ലോക്കുകളിലും യുഡിഎഫാണ് വിജയിച്ചത്. മലപ്പുറം ജില്ലാ പഞ്ചായത്തില്‍ പ്രതിപക്ഷമില്ലാതെയാണ് യുഡിഎഫിന്റെ ഭരണം വരാന്‍ പോകുന്നത്. ആകെയുള്ള 33 ഡിവിഷനുകളില്‍ 33ഉം യുഡിഎഫ് തൂത്തുവാരി. കഴിഞ്ഞ തവണ രണ്ടു ഡിവിഷനുകളിലായിരുന്നു എല്‍ഡിഎഫ് വിജയിച്ചിരുന്നത്. 2025ല്‍ അതും യുഡിഎഫ് പിടിച്ചെടുത്തു.

മംഗംലം, വഴിക്കടവ് ഡിവിഷനുകളിലായിരുന്നു കഴിഞ്ഞ വര്‍ഷം എല്‍ഡിഎഫ് വിജയിച്ചിരുന്നത്. കഴിഞ്ഞ തവണ വഴിക്കടവ് ഡിവിഷന്‍ യുഡിഎഫില്‍ നിന്ന് പിടിച്ചെടുത്ത് അട്ടിമറി വിജയം നേടിയ ഷെറോണയിലൂടെ ചുങ്കത്തറയിലും അട്ടിമറി നടത്താനാവുമെന്നാണ് എല്‍ഡിഎഫ് കരുതിയത്. എന്നാല്‍ ചുങ്കത്തറ കിട്ടിയതുമില്ല. വഴിക്കടവ് പോകുകയും ചെയ്തു. ഗ്രാമ പഞ്ചായത്തുകളിലും യുഡിഎഫ് മുന്നേറ്റമാണ് മലപ്പുറത്ത്. 90 പഞ്ചായത്തുകള്‍ യുഡിഎഫ് നേടിയപ്പോള്‍ എല്‍ഡിഎഫിന്റെ നേട്ടം വെറും മൂന്നിലൊതുങ്ങി. മുന്‍സിപ്പാലിറ്റികളിലും യുഡിഎഫിന് തന്നെയാണ് മുന്നേറ്റം. ആകെയുള്ള 12 മുനിസിപ്പാലിറ്റികളില്‍ പതിനൊന്നും യിഡിഎഫ് സ്വന്തമാക്കിയപ്പോള്‍ എല്‍ഡിഎഫിന്റെ നേട്ടം ഒന്നിലൊതുങ്ങി. പൊന്നാനി മുനിസിപ്പാലിറ്റിയാണ് എല്‍ഡിഎഫ് വിജയക്കൊടി പാറിയത്.