സോഷ്യല്‍ ഫോറം ഒമാന്‍ കൊവിഡ് വാക്‌സിനേഷന്‍ ക്യാമ്പയിന്‍ സംഘടിപ്പിച്ചു

മസ്‌കറ്റ്: ഇന്ത്യയുടെ എഴുപത്തിയഞ്ചാം സ്വാതന്ത്ര്യ ദിനാഘോഷത്തിന്റെ ഭാഗമായി സോഷ്യല്‍ ഫോറം ഒമാന്‍ ഗാല ഘടകം, ഗോബ്ര ആസ്റ്റര്‍ അല്‍ റഫ ഹോസ്പിറ്റലിന്റെ സഹകരണത്തോടുകൂടി സ്വാതന്ത്രദിന സുദിനത്തില്‍ കൊവിഡ് വാക്‌സിനേഷന്‍ ക്യാമ്പും ബോധവല്‍ക്കരണ പരിപാടിയും സംഘടിപ്പിച്ചു.

സോഷ്യല്‍ ഫോറം ഒമാന്‍ ഗാല ഘടകം പ്രതിനിധി മന്‍സൂര്‍ തൃശ്ശൂരിന്റെ അധ്യക്ഷതയില്‍ ഡോ. ഹേമന്ദ് ഹര്‍ദിക്കര്‍ (ആസ്റ്റര്‍ അല്‍ റഫ) ഉദ്ഘാടനം നിര്‍വഹിച്ചു. ഷാഫി തിരുവനന്തപുരം ഡോ. ഹേമന്ദ് ഹര്‍ദിക്കറിന് ഉപഹാരം നല്‍കി, ആസ്റ്റര്‍ പ്രതിനിധി ഫസലുറഹ്മാന്‍ പരിപാടിയില്‍ സാന്നിധ്യമായി. തുടര്‍ന്ന് മധുര വിതരണവും നടന്നു.

സലീം കണ്ണൂര്‍, റമീസ് അലി കാരന്തൂര്‍ എന്നിവര്‍ പരിപാടികള്‍ നിയന്ത്രിച്ചു. സോഷ്യല്‍ ഫോറം ഒമാന്‍ ഗാല പ്രതിനിധി ഷിജാസ് തലശ്ശേരി നന്ദി പറഞ്ഞു.