എസ്ഐആര്‍; തമിഴ്നാട്ടില്‍ കരട് വോട്ടര്‍ പട്ടിക പ്രസിദ്ധീകരിച്ചു, 97.4 ലക്ഷം പേരെ നീക്കം ചെയ്തു

ചെന്നൈ: തീവ്ര വോട്ടര്‍ പട്ടിക പരിഷ്‌കരണത്തിനു ശേഷം തമിഴ്നാട്ടില്‍ കരട് വോട്ടര്‍ പട്ടിക പ്രസിദ്ധീകരിച്ചു. എസ്ഐആറിലൂടെ 97.37 ലക്ഷം പേരുകളാണ് വോട്ടര്‍ പട്ടികയില്‍നിന്ന് നീക്കം ചെയ്തിരിക്കുന്നത്. കരട് പട്ടികയില്‍ 5.43 കോടി വോട്ടര്‍മാരാണ് തമിഴ്നാട്ടിലുള്ളത്. നേരത്തെ 6.41 കോടി വോട്ടര്‍മാരായിരുന്നു ഉണ്ടായിരുന്നത്. മരിച്ചവര്‍, ഇരട്ട വോട്ടുകള്‍, കണ്ടെത്തനാകാത്തവര്‍ തുടങ്ങിയവരെയാണ് എസ്‌ഐആറിലൂടെ പട്ടികയില്‍നിന്ന് നീക്കം ചെയ്യുന്നത്.

കരട് പട്ടികയില്‍ ആകെയുള്ള 5.43 വോട്ടര്‍മാരില്‍ 2.77 കോടി പുരുഷന്മാരും 2.66 കോടി സ്ത്രീകളുമാണുള്ളത്. നീക്കം ചെയ്തവരില്‍ 26.94 ലക്ഷം പേര്‍ മരിച്ചവരാണെന്ന് തമിഴ്നാട് മുഖ്യ തിരഞ്ഞെടുപ്പ് ഓഫീസര്‍ അര്‍ച്ചന പട്നായിക് പറഞ്ഞു. ഇരട്ട വോട്ടുള്ളവരായി കണ്ടെത്തി നീക്കം ചെയ്തത് 3.4 ലക്ഷം പേരുകളാണ്. 66.44 ലക്ഷം പേരുകള്‍ പരിശോധനയില്‍ രജിസ്റ്റര്‍ ചെയ്ത വിലാസത്തില്‍ കണ്ടെത്താന്‍ സാധിക്കാത്തവരാണെന്നും മുഖ്യ തിരഞ്ഞെടുപ്പ് ഓഫീസര്‍ അറിയിച്ചു. ചെന്നൈയില്‍ മാത്രം 14 ലക്ഷം പേരുകള്‍ കരട് പട്ടികയില്‍നിന്ന് നീക്കം ചെയ്തിട്ടുണ്ട്.