മോദിക്ക് പഠിക്കുകയല്ല, മോദിയെ പഠിപ്പിക്കുകയാണ് പിണറായി വിജയന്‍; രൂക്ഷവിമര്‍ശനവുമായി ഷാഫി പറമ്പില്‍

പാലക്കാട്: മോദിക്ക് പഠിക്കുകയല്ല, മോദിയെ പഠിപ്പിക്കുകയാണ് മുഖ്യമന്ത്രി പിണറായി വിജയനെന്ന് ഷാഫി പറമ്പില്‍ എംഎല്‍എ. പിണറായി വിജയന്‍ രാജാവായി ഭരിക്കുകയാണ്. അദ്ദേഹം പുറത്തിറങ്ങിയാല്‍ ജനങ്ങള്‍ ബുദ്ധിമുട്ടുന്ന അവസ്ഥയാണ് ഇന്നുള്ളത്. കരിങ്കൊടി പ്രതിഷേധങ്ങളെ പോലിസിനെ ഉപയോഗിച്ച് അടിച്ചമര്‍ത്തിയാല്‍ സമരങ്ങള്‍ കരിഞ്ഞുപോവുമെന്ന് കരുതേണ്ടെന്ന് ഷാഫി പറമ്പില്‍ പറഞ്ഞു. പൊതു ജനങ്ങള്‍ക്ക് മുഖ്യമന്ത്രി ഒരു ബാധ്യതയായി മാറി. കാക്കക്കും ആനക്കും പോലും മുഖ്യമന്ത്രി ബാധ്യതയാണ്.

പോലിസും ബാരിക്കേഡും വച്ചിട്ട് വിരട്ടല്‍ ഇങ്ങോട്ട് വേണ്ടെന്ന തള്ളലെങ്കിലും മുഖ്യമന്ത്രി അവസാനിപ്പിക്കണം. ശരി തമ്പ്രാ എന്ന് പറഞ്ഞ് ഓച്ചാനിച്ച് നില്‍ക്കാന്‍ ഇത് രാജഭരണമൊന്നുമല്ലെന്ന് ഷാഫി പറമ്പില്‍ കുറ്റപ്പെടുത്തി. മുഖ്യമന്ത്രിക്കെതിരേ ഇന്നും കനത്ത പ്രതിഷേധമാണ് അരങ്ങേറിയത്. പ്രതിപക്ഷ യുവജന സംഘടനകളുടെ പ്രതിഷേധത്തിനിടെ മുഖ്യമന്ത്രിയുടെ പൊതുപരിപാടികള്‍ തുടരുകയാണ്. മലപ്പുറത്ത് തവനൂര്‍ സെന്‍ട്രല്‍ ജയില്‍ ഉദ്ഘാടനമായിരുന്നു ആദ്യപരിപാടി. തൃശൂരില്‍ നിന്ന് കനത്ത സുരക്ഷയിലാണ് മുഖ്യമന്ത്രി ഇവിടെ എത്തിയത്. വഴികളടച്ചാണ് മുഖ്യമന്ത്രിക്ക് പോലിസ് സുരക്ഷ ഒരുക്കിയത്.