അന്നമനട ഗ്രാമപഞ്ചായത്തിന് 'ശുചിത്വപദവി'

മാള: അന്നമനട ഗ്രാമപഞ്ചായത്തിന് ശുചിത്വ പദവി. ഗ്രാമപഞ്ചായത്തിലെ ശുചിത്വ- മാലിന്യ സംസ്‌കരണ പദ്ധതികളുടെ നടത്തിപ്പുമായി ബന്ധപ്പെട്ട് നടത്തിയ പ്രവൃത്തികളുടെ അടിസ്ഥാനത്തിലാണ് ശുചിത്വ പദവി ലഭിച്ചത്. മാള ബ്ലോക്ക് പഞ്ചായത്ത് പരിധിയില്‍ നിലവില്‍ അന്നമനട ഗ്രാമപഞ്ചായത്തിന് മാത്രമാണ് ഈ പദവി ലഭിച്ചിട്ടുള്ളത്. ഗ്രാമപഞ്ചായത്തിന്റെ ശുചിത്വ പദവി പ്രഖ്യാപനം ഗ്രാമപഞ്ചായത്ത് പ്രസിഡന്റ് ടെസ്സി ടൈറ്റസ് നിര്‍വ്വഹിച്ചു. വൈസ് പ്രസിഡന്റ് ടി കെ ഗോപി അധ്യക്ഷത വഹിച്ചു. സ്ഥിരം സമിതി അംഗങ്ങളായ മിനിത ബാബു, ബേബി പൗലോസ്, പി ഒ പൗലോസ് തുടങ്ങിയവര്‍ സംസാരിച്ചു. ഹരിത കേരള മിഷന്‍ കോ ഓര്‍ഡിനേറ്റര്‍ ജയകുമാര്‍ വീഡിയോ കോളിലൂടെ യോഗത്തിന് ആശംസ പറഞ്ഞു. ഗ്രാമപഞ്ചായത്ത് സെക്രട്ടറി ടി ജെ റീന നന്ദി പറഞ്ഞു.