രാമപുരത്ത് വീണ്ടും തെരുവുനായ ആക്രമണം

കോട്ടയം: രാമപുരത്ത് എടിഎം കൗണ്ടറില്‍ നിന്ന് ഇറങ്ങി വന്നയാളെ തെരുവ് നായ്ക്കള്‍ ആക്രമിച്ചു. നാല് തെരുവ് നായ്ക്കള്‍ ചേര്‍ന്ന് രാമപുരം കുന്നേല്‍ ബിജു(47) വിനെയാണ് ആക്രമിച്ചത്. ആക്രമണത്തില്‍ ബിജുവിന്റെ കാലിന് ആഴത്തില്‍ മുറിവേറ്റു. തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

കഴിഞ്ഞ ദിവസം രാമപുരം കോളജ് ജംങ്ഷന് സമീപം തെരുവുനായയുടെ കടിയേറ്റ് അഞ്ച് പേര്‍ക്ക് പരിക്കു പറ്റിയിരുന്നു. ബിജുവിന് നേരിട്ട ആക്രമണം കൂടിയായതോടെ രാമപുരത്തും പരിസര പ്രദേശങ്ങളിലുമുള്ള തെരുവ് നായ അക്രമണം നിയന്ത്രിക്കാന്‍ പഞ്ചായത്ത് അധികൃതര്‍ യാതൊരു നടപടിയും സ്വീകരിക്കുന്നില്ലന്ന ആക്ഷേപം ശക്തമായി. കോളങ് ജങ്ഷന്‍, ടൗണ്‍ എന്നിവിടങ്ങളിലുള്‍പ്പെടെ പ്രധാന ഇടങ്ങളിലെല്ലാം നായശല്യമുണ്ട്.