പോലിസിനെ വെട്ടാന്‍ ശ്രമിച്ച് കാപ്പാ കേസ് പ്രതി; വെടിവച്ച് എസ്എച്ച്ഒ

തിരുവനന്തപുരം: പോലിസിനെ ആക്രമിക്കാന്‍ ശ്രമിച്ച കാപ്പാ കേസ് പ്രതിക്ക് നേരെ എസ്എച്ച്ഒ വെടിയുതിര്‍ത്തു. ആര്യങ്കോട് എസ്എച്ച്ഒ തന്‍സീം അബ്ദുള്‍ സമദാണ് പ്രതി കൈരി കിരണിന് നേരെ വെടിയുതിര്‍ത്തത്. കിരണ്‍ വെട്ടുകത്തി കൊണ്ട് ആക്രമിക്കാന്‍ ശ്രമിച്ചപ്പോഴാണ് വെടിയുതിര്‍ത്തതെന്ന് പോലിസ് പറഞ്ഞു. പ്രതിയുടെ ദേഹത്ത് വെടി കൊണ്ടില്ലയെന്നും പ്രതി രക്ഷപ്പെട്ടെന്നും പോലിസ് പറഞ്ഞു. സ്വയരക്ഷയ്ക്ക് വേണ്ടിയുള്ള നടപടിയാണെന്ന് ഡിഐജി വ്യക്തമാക്കി.

ഇന്ന് രാവിലെയാണ് സംഭവം. കാപ്പ കേസില്‍ നടുകടത്തിയ കൈരി കിരണ്‍ നാടുകടത്തല്‍ ഉത്തരവ് ലംഘിച്ച് ഇന്നലെ രാത്രി മുതല്‍ ആര്യങ്കോടുള്ള വീട്ടില്‍ ഉണ്ടായിരുന്നുവെന്ന് കണ്ടെത്തിയതോടെ രാത്രി മുതല്‍ ഇയാളെ പിടികൂടി കരുതല്‍ തടങ്കലില്‍ പാര്‍പ്പിക്കുന്നതിനുള്ള ശ്രമങ്ങള്‍ നടത്തി വരുകയായിരുന്നു. ഇന്ന് രാവിലെ എസ്എച്ച്ഒ തന്‍സീം അബ്ദുള്‍ സമദിന്റെ നേതൃത്വത്തിലുള്ള ഉദ്യോഗസ്ഥര്‍ കൈരി കിരണിന്റെ വീട് വളയുകയും കൈരി കിരണിനെ പിടികൂടാനുള്ള ശ്രമങ്ങള്‍ നടത്തുകയുമായിരുന്നു. അതിനിടെ വെട്ടുകത്തി എടുത്തുകൊണ്ട് പ്രതി വീടിന് പുറത്തേക്ക് വരുകയും. ഒന്നിലധികം തവണ എസ്എച്ച്ഒയെ വെട്ടാന്‍ ശ്രമിക്കുകയും ചെയ്തു. എസ്എച്ച്ഒ ഒഴിഞ്ഞ് മാറിയത് കൊണ്ടാണ് ആക്രമണത്തില്‍ നിന്ന് രക്ഷപ്പെട്ടതെന്നും വീണ്ടും ആക്രമണം തുടരുന്ന സാഹചര്യത്തിലാണ് വെടിയുതിര്‍ത്തതെന്നും ഉദ്യോഗസ്ഥര്‍ വ്യക്തമാക്കി.