ഓണകിറ്റ് വിതരണം: സെപ്റ്റംബര്‍ നാലു മുതല്‍ പോര്‍ട്ടബിലിറ്റി സൗകര്യം ലഭിക്കും

തിരുവനന്തപുരം: ഓണത്തോടനുബന്ധിച്ച് സംസ്ഥാന സര്‍ക്കാര്‍ വിതരണം ചെയ്യുന്ന സൗജന്യ ഓണക്കിറ്റ് സര്‍ക്കാര്‍ നിശ്ചയിച്ച തിയ്യതികളില്‍ വാങ്ങാന്‍ കഴിയാത്ത എല്ലാ കാര്‍ഡ് ഉടമകള്‍ക്കും സെപ്റ്റംബര്‍ നാല്, അഞ്ച്, ആറ്, ഏഴ് തീയതികളില്‍ ഏത് റേഷന്‍ കടയില്‍ നിന്നും വാങ്ങാനുള്ള പോര്‍ട്ടബിലിറ്റി സൗകര്യം ലഭിക്കുമെന്ന് ജില്ലാ സപ്ലൈ ഓഫിസര്‍ അറിയിച്ചു. ഏഴിന് ശേഷം കിറ്റ് വിതരണം ഇല്ല.

സംസ്ഥാനത്ത് ഇന്നലെ മുതല്‍ റേഷന്‍ കടകള്‍ വഴി കിറ്റുകള്‍ വിതരണം ചെയ്തു തുടങ്ങി. തുണിസഞ്ചി ഉള്‍പ്പെടെ 14 ഇനം സാധനങ്ങളാണ് കിറ്റിലുണ്ടാവുക.

മഞ്ഞകാര്‍ഡ് ഉടമകള്‍ക്ക് ഇന്നുകൂടെ കിറ്റുകള്‍ നല്‍കും. ആഗസ്റ്റ് 25, 26, 27 തിയ്യതികളില്‍ പിങ്ക് കാര്‍ഡ് ഉടമകള്‍ക്കും ആഗസ്റ്റ് 29, 30, 31 തിയ്യതികളില്‍ നീല കാര്‍ഡ് ഉടമകള്‍ക്കുമാണ് കിറ്റുകള്‍ നല്‍കുന്നത്. ഈ ദിവസങ്ങളില്‍ കാര്‍ഡുടമകളുടെ റേഷന്‍കടകളില്‍നിന്നു മാത്രമേ കിറ്റുകള്‍ ലഭിക്കുകയുള്ളൂ.

ഈ ദിവസങ്ങളില്‍ കിറ്റ് കൈപ്പറ്റാന്‍ കഴിയാത്തവര്‍ക്ക് സപ്തംബര്‍ 4, 5, 6, 7 തിയ്യതികളില്‍ ഏത് റേഷന്‍ കടയില്‍നിന്നും കിറ്റ് ലഭിക്കും. ഓണത്തിനുശേഷം കിറ്റ് വിതരണം ഉണ്ടാവില്ല.

ആദിവാസി ഊരുകളില്‍ വാതിര്‍പ്പടി വിതരണമായിരിക്കും.