ഓട്ടതാന്നിക്കൽ ഭാഗത്ത് കുടിവെള്ളം ലഭിക്കുന്നില്ലെന്ന് പരാതി

അരീക്കോട്: ഊർങ്ങാട്ടിരി ഓട്ടതാന്നിക്കലിൽ പഞ്ചായത്ത് ഫണ്ട് ഉപയോഗിച്ച് നിർമ്മിച്ച കുടിവെള്ള പദ്ധതിയിൽ നിന്ന് വെള്ളം ലഭിക്കുന്നില്ലെന്ന് ഗുണഭോക്താക്കൾ പരാതിയുയർത്തി. ഓട്ടതാന്നിക്കൽ ലക്ഷം വീട് ഉൾപ്പെടെ അൻപതിലേറെ കുടുംബങ്ങൾ ആശ്രയിച്ചിരുന്ന കുടിവെള്ള പദ്ധതിയിൽ പമ്പിംഗ് ചുമതലയുള്ളപ്രാദേശിക കൺവീനറുടെ നേതൃത്വത്തിലാണ് പമ്പിംഗ് നടന്നിരുന്നത്. എന്നാൽ ഇവരുടെ അനാസ്ഥ മൂലം ഒരു വർഷത്തിലേറെയായി കുടിവെള്ളം മുടങ്ങിയിരിക്കയാണ്. പമ്പിംഗിന് ഉപയോഗിക്കുന്ന മോട്ടോർ കേടുവന്നതിനാലാണ് മുടങ്ങിയതെന്ന് കൺവീനർ പറയുന്നുവെങ്കിലും ഒരു വർഷമായിട്ടും റിപ്പയർ ചെയ്യാൻ തയ്യാറാകാത്തത് രാഷ്ട്രീയം മൂലമാണെന്ന് കോളനിക്കാർ പറഞ്ഞു. അടിയന്തിരമായി കോളനിക്കാർക്ക് കുടിവെള്ളം ലഭിക്കാനുള്ള നടപടി സ്വീകരിക്കുമെന്ന് സ്ഥലം സന്ദർശിച്ച പ്രദേശത്തെ എസ്ഡിപിഐ ഭാരവാഹികൾ പ്രദേശവാസികൾക്ക് ഉറപ്പു നൽകി.