Mon Feb 18 2019 11:30:51 GMT+0530 (IST)
രാജ്യത്തെ ഓണ്‍ലൈന്‍ വിപണി കൈപിടിയിലൊതുക്കാനൊരുങ്ങി റിലയന്‍സ്
റിലയന്‍സ് റീടെയ്ല്‍, റിലയന്‍സ് ജിയോ, ഇന്‍ഫോകോം എന്നീ കമ്പനികള്‍ സംയുക്തമായിട്ടായിരിക്കും പുതിയ ഇ കോമേഴ്‌സ് പ്ലാറ്റ്‌ഫോം ആരംഭിക്കുക.
2019-01-18T23:42:57+05:30
മുംബൈ: ഇന്ത്യന്‍ ഇ കൊമേഴ്‌സ് വിപണി കീഴടക്കാന്‍ റിലയന്‍സ് എത്തുന്നു. ചെനീസ് ഇ കൊമേഴ്‌സ് രാജാക്കന്‍മാരായ ആലിബാബയുടെ മാതൃകയിലൊരുങ്ങുന്ന പദ്ധതി പ്രാവര്‍ത്തികമാവുന്നതോടെ ഇന്ത്യന്‍ ഓണ്‍ലൈന്‍ ചില്ലറ വില്‍പ്പന രംഗത്ത് മല്‍സരം കടുക്കും. റിലയന്‍സ് റീടെയ്ല്‍, റിലയന്‍സ് ജിയോ, ഇന്‍ഫോകോം എന്നീ കമ്പനികള്‍ സംയുക്തമായിട്ടായിരിക്കും പുതിയ ഇ കോമേഴ്‌സ് പ്ലാറ്റ്‌ഫോം ആരംഭിക്കുക. റിലയന്‍സ് ഇന്‍ഡസ്ട്രീസ് ചെയര്‍മാനും മാനേജിങ് ഡയറക്ടറുമായ മുകേഷ് അംബാനിയാണ് ഇക്കാര്യം പ്രഖ്യാപിച്ചത്. ഗുജറാത്തിലാണ് ഈ സേവനം ആദ്യം ലഭ്യമാകുക. അഹമ്മദാബാദില്‍ നടന്ന വൈബ്രന്റ് ഗുജറാത്ത് എന്ന നിക്ഷേപ സംഗമത്തില്‍ പ്രധാനമന്ത്രി നരേന്ദ്ര മോദിയുടെ സാന്നിധ്യത്തിലാണ് മുകേഷ് അംബാനി പ്രഖ്യാപനം നടത്തിയത്. 2 ലക്ഷം വ്യാപാരികളെ കോര്‍ത്തിണക്കി കൊണ്ടാണ് പദ്ധതി വിഭാവനം ചെയ്യുന്നത്.ഓണ്‍ലൈനിലെയും ഓഫ്‌ലൈനിലെയും മികച്ച ഷേപ്പിങ് അനുഭവങ്ങള്‍ സംയോജിപ്പിച്ചു കൊണ്ടുളള സംരംഭമാണ് അണിയറയില്‍ ഒരുങ്ങുന്നത്. ജിയോ പോലെ വന്‍ ഓഫറുകളോടെയാവും ഇ കൊമേഴ്‌സ് രംഗത്തെ റിലയന്‍സിന്റെ കടന്ന് വരവെന്ന് സൂചനയുണ്ട്.
അടുത്ത 10 വര്‍ഷത്തിനുളളില്‍ ഗ്രൂപ്പിന്റെ മൊത്തവരുമാനത്തിന്റെ പകുതി ഉപഭോക്തൃ ബിസിനസില്‍ നിന്നും സ്വരൂപിക്കാനാണ് റിലയന്‍സ് ലക്ഷ്യമിടുന്നത്. നിലവില്‍ ഗ്രൂപ്പിന്റെ 80 ശതമാനം വില്‍പ്പനയും വരുന്നത് പരമ്പരാഗത എണ്ണ, പ്രകൃതി വാതക ബിസിനസുകളില്‍ നിന്നാണ്.
