ശബരിമലയിലെ ദ്വാരപാലക ശില്‍പങ്ങളിലെ താങ്ങുപീഠം കാണാതായ സംഭവം; ആസൂത്രിത ഗൂഢാലോചന നടക്കുന്നതായി മന്ത്രി വി എന്‍ വാസവന്‍

തിരുവനന്തപുരം: ശബരിമലയിലെ ദ്വാരപാലക ശില്‍പങ്ങളിലെ താങ്ങുപീഠം കാണാതായ സംഭവത്തില്‍ ആസൂത്രിത ഗൂഢാലോചന നടന്നതായി ദേവസ്വം വകുപ്പ് മന്ത്രി വി എന്‍ വാസവന്‍. സ്പോണ്‍സര്‍ ഉണ്ണികൃഷ്ണന്‍ പോറ്റി ആളുകളെ വിഡ്ഢികളാക്കിയെന്നും ഉണ്ണികൃഷ്ണന്‍ പോറ്റി പറയുന്ന കാര്യങ്ങള്‍ വിശ്വസിക്കാന്‍ കഴിയാത്ത അവസ്ഥയായെന്നും മന്ത്രി പറഞ്ഞു.

വിഷയത്തില്‍ കോടതിയില്‍ റിപോര്‍ട്ട് സമര്‍പ്പിക്കുമെന്നും കോടതി പുറപ്പെടുവിക്കുന്ന ഉത്തരവിന്റെ അടിസ്ഥാനത്തില്‍ തുടര്‍ നടപടികള്‍ സര്‍ക്കാര്‍ തീരുമാനിക്കുമെന്നും മന്ത്രി പറഞ്ഞു. ശബരിമലയില്‍ എന്തോ അഴിമതി നടക്കുന്നുവെന്ന് പ്രതിപക്ഷം അവരുടെ കാലത്തെ ഓര്‍മ്മകള്‍ വച്ചു പറയുകയാണെന്നും അദ്ദേഹം പറഞ്ഞു. സുതാര്യമായ പ്രവര്‍ത്തനങ്ങളാണ് തിരുവിതാംകൂര്‍ ദേവസ്വം ബോര്‍ഡിന്റെ ഭാഗത്ത് നിലവില്‍ നടക്കുന്നത്. ശബരിമലയിലെ തീര്‍ഥാടന കാലഘട്ടം മികച്ച രീതിയിലാണ് കടന്നുപോകുന്നത്. അത്തരമൊരു സംഗതിയെ ഇല്ലാകഥ വച്ച് പൊളിച്ചിടാനുള്ള ശ്രമം വിജയിക്കില്ലെന്നും വാസവന്‍ പറഞ്ഞു.

ഇന്നലെ വൈകുന്നേരത്തോടെയാണ് ശബരിമലയിലെ കാണാതായ ദ്വാരപാലക പീഠം സ്പോണ്‍സര്‍ ഉണ്ണിക്കൃഷ്ണന്‍ പോറ്റിയുടെ സഹോദരിയുടെ വീട്ടില്‍ നിന്നു കണ്ടെത്തിയത്. വിജിലന്‍സ് നടത്തിയ പരിശോധനയിലാണ് ദ്വാരപാലക പീഠം കണ്ടെടുത്തത്. ഉണ്ണിക്കൃഷ്ണന്‍ പോറ്റിയുടെ സഹായിയായ കാരേറ്റ് സ്വദേശി വാസുദേവന്റെ വീട്ടിലാണ് 2021മുതല്‍ പീഠം സൂക്ഷിച്ചിരുന്നതെന്നാണ് വിവരം. അന്വേഷണത്തിന് ഹൈക്കോടതി ഉത്തരവിട്ടതോടെ ഇത് സൂക്ഷിക്കാനാവില്ലെന്ന് ഉണ്ണിക്കൃഷ്ണനെ വാസുക്കുകയായിരുന്നു.