ഡല്‍ഹി ജിബി പന്ത് ആശുപത്രിയില്‍ മലയാളം വിലക്ക്; ഭാഷാ വിവേചനം അവസാനിപ്പിക്കണമെന്ന് രാഹുല്‍ ഗാന്ധി

ന്യൂഡല്‍ഹി: ഡല്‍ഹിയിലെ ജിബി പന്ത് ആശുപത്രിയില്‍ മലയാളം സംസാരിക്കുന്നത് വിലക്കിയ നടപടിക്കെതിരെ രൂക്ഷ വിമര്‍ശനവുമായി കോണ്‍ഗ്രസ് എംപി രാഹുല്‍ ഗാന്ധി. മലയാളം മറ്റ് ഇന്ത്യന്‍ ഭാഷകളെപ്പോലെ തന്നെയാണെന്നും ഭാഷാ വിവേചനം അവസാനിപ്പിക്കണമെന്നും രാഹുല്‍ ഗാന്ധി ട്വീറ്റ് ചെയ്തു.

കഴിഞ്ഞ ദിവസമാണ് നഴ്‌സുമാര്‍ ഡ്യൂട്ടിക്കിടയില്‍ മലയാളം സംസാരിക്കരുതെന്ന് ആശുപത്രി സൂപ്രണ്ട് ഉത്തരവിറക്കിയത്. എന്നാല്‍ മറ്റു ഭാഷകള്‍ സംസാരിക്കുന്നതിന് വിലക്ക് ഏര്‍പ്പെടുത്തിയിട്ടുമില്ല. ഇതിനെതിരില്‍ പ്രതിഷേധം ശക്തമാക്കാനൊരുങ്ങുകയാണ് നഴ്സുമാര്‍. ഓണ്‍ലൈന്‍ മുഖേന ചേര്‍ന്ന നഴ്സുമാരുടെ യോഗം ആക്ഷന്‍ കമ്മിറ്റി രൂപീകരിച്ച് ഇന്നുമുതല്‍ പ്രക്ഷോഭം ശക്തമാക്കാന്‍ തീരുമാനിച്ചിട്ടുണ്ട്. വിഷയത്തില്‍ ഇടപെട്ട് കേരളത്തില്‍ നിന്നുള്ള എംപിമാര്‍ തീരുമാനം ഉടന്‍ പിന്‍വലിക്കണമെന്ന് ആരോഗ്യമന്ത്രി ഹര്‍ഷവര്‍ധനോട് ആവശ്യപ്പെട്ടു.