ജനങ്ങള്‍ക്ക് ആവേശമായി മലബാര്‍ സമരാനുസ്മരണ യാത്ര മലപ്പുറം ജില്ലയില്‍

പരപ്പനങ്ങാടി: 'മലബാര്‍ സമര പോരാളികളെ നിന്ദിക്കുന്നത് രാജ്യദ്രോഹം' എന്ന തലക്കെട്ടില്‍ മലബാര്‍ സമര അനുസ്മരണ സമിതി നടത്തുന്ന സമരാനുസ്മരണ യാത്ര മലപ്പുറം ജില്ലയില്‍ പ്രയാണമാരംഭിച്ചു. രണ്ടാം ദിനമായ ഇന്ന് രാവിലെ പുത്തനത്താണിയില്‍ നിന്ന് തുടങ്ങിയ യാത്ര ആലത്തിയൂര്‍, തിരൂര്‍, താനൂര്‍ വഴി പരപ്പനങ്ങാടിയില്‍ സമാപിച്ചു.

പരിപാടിയില്‍ കോഓര്‍ഡിനേറ്റര്‍ ടി മുജീബ് റഹ്മാന്‍ പ്രഭാഷണം നടത്തി. ലോകശ്രദ്ധയാകര്‍ഷിച്ച മലബാര്‍ വിപ്ലവത്തിന് ഒരു നൂറ്റാണ്ട് തികയുമ്പോള്‍ സമര പോരാട്ടവും സമര നായകരും ജനഹൃദയങ്ങളില്‍ ആവേശമായി ഇന്നും നിലകൊള്ളുന്നു. മറുഭാഗത്ത് ജനനായകരെ ഇകഴ്ത്തിക്കൊണ്ടു ചരിത്രസംഭവങ്ങളെ തെറ്റിദ്ധരിപ്പിക്കാനുള്ള ശ്രമത്തിലാണ് സംഘപരിവാരം. ഈ വിപ്ലവത്തെ മലബാര്‍ കലാപം എന്ന് മുദ്ര കുത്തുന്നതും കേന്ദ്ര സര്‍ക്കാര്‍ പ്രസിദ്ധീകരിച്ച സ്വാതന്ത്ര്യ സമര രക്തസാക്ഷികളുടെ പട്ടികയില്‍ നിന്ന് മാപ്പിള രക്തസാക്ഷികളെ നീക്കം ചെയ്തതും അതിന്റെ ഭാഗമാണന്ന് അദ്ദേഹം ഓര്‍മ്മപ്പെടുത്തി.

അതിജീവന കലാ സംഘം അവതരിപ്പിക്കുന്ന തെരുവുനാടകവും മലബാര്‍ ചരിത്രവുമായി ബന്ധപ്പെട്ട വിവിധ പ്രസാധകരുടെ പുസ്തകങ്ങള്‍ ലഭ്യമാക്കിയ പുസ്തക വണ്ടിയും സമര സ്മരണകളുണര്‍ത്തുന്ന പാട്ടുവണ്ടിയും യാത്രയില്‍ സജ്ജമാക്കി.

പരിപാടിക്ക് പ്രോഗ്രാം കോര്‍ഡിനേറ്റര്‍ ടി മുജീബ് റഹ്മാന്‍, മുനീര്‍ ചുങ്കപ്പാറ, ഹസനുല്‍ ബെന്ന, ഷാനിഫ് എന്നിവര്‍ നേതൃത്വം നല്‍കി. യാത്ര നവംബര്‍ 25ന് തിരുവനന്തപുരത്ത് സമാപിക്കും.