ഷാന്റി ജോസഫ് തട്ടകത്ത് മൂന്നാമതും മാള പ്രസ്സ് ക്ലബ്ബ് പ്രസിഡന്റ്

മാള: മാള പ്രസ്സ് ക്ലബ്ബ് പ്രസിഡന്റായി ഷാന്റി ജോസഫ് തട്ടകത്തിനെ മൂന്നാം തവണയും തിരഞ്ഞെടുത്തു. മാള പ്രസ്സ് ക്ലബ്ബ് ഹാളില്‍ നടന്ന പൊതുയോഗത്തിലാണ് ഷാന്റി ജോസഫ് തട്ടകത്തിനെ തിരഞ്ഞെടുത്തത്. നിലവില്‍ മാള അരവിന്ദന്‍ ഫൗണ്ടേഷന്‍, മാള പൗരാവലി എന്നീ സംഘടനകളുടെ സെക്രട്ടറിയായി പ്രവര്‍ത്തിക്കുന്നുണ്ട്. പ്രസ് ക്ലബ്ബ് സെക്രട്ടറിയായി പി കെ അബ്ബാസിനെയും ട്രഷററായി ലിന്റീഷ് ആന്റോയെയും വൈസ് പ്രസിഡന്റ് കെ എം ബാവ, ജോ. സെക്രട്ടറി സലിം എരവത്തൂര്‍, ഭരണ സമിതി അംഗങ്ങളായി ഇ സി ഫ്രാന്‍സിസ്, ഇ പി രാജീവ്, ഓഡിറ്ററായി നജീബ് അന്‍സാരി എന്നിവരെയും തിരഞ്ഞെടുത്തു. പി കെ എം അഷറഫ് വരണാധികാരിയായിരുന്നു. യോഗത്തില്‍ പ്രസിഡന്റ് ഷാന്റി ജോസഫ് തട്ടകത്ത് അധ്യക്ഷത വഹിച്ചു. സെക്രട്ടറി ഇ പി രാജീവ് റിപ്പോര്‍ട്ടും ഖജാന്‍ജി ലിജോ പയ്യപ്പിള്ളി കണക്കും അവതരിപ്പിച്ചു. പ്രസ്സ് ക്ലബ്ബ് സ്ഥാപകാംഗങ്ങളായ എ ജി മുരളീധരന്‍, സി ആര്‍ പുരുഷോത്തമന്‍, ഇ സി ഫ്രാന്‍സിസ് എന്നിവരും നജീബ് അന്‍സാരി, കെ എം ബാവ, ഇ രമേശ്, സലിം എരവത്തൂര്‍, പി കെ അബ്ബാസ് തുടങ്ങിയവരും സംസാരിച്ചു.