കൊലപാതകശ്രമക്കേസ്സിലെ മൂന്ന് പ്രതികളെ മാള പോലിസ് അറസ്റ്റ് ചെയ്തു.

മാള(തൃശ്ശൂര്‍): കൊലപാതകശ്രമക്കേസ്സിലെ മൂന്ന് പ്രതികളെ മാള പോലിസ് അറസ്റ്റ് ചെയ്തു. കാരുമാത്ര പണിക്കശ്ശേരി വീട്ടില്‍ സിജില്‍ (27), കാരുമാത്ര മേക്കാട്ടു വീട്ടില്‍ ടിറ്റൊ (31), കാരുമാത്ര മേക്കാട്ടു വീട്ടില്‍ സാജന്‍(29) എന്നിവരാണ് അറസ്റ്റിലായത്. ഒക്ടോബര്‍ 11ന് വെള്ളാങ്കല്ലൂര്‍ കാരുമാത്ര ആലുക്ക പറമ്പില്‍ ആള്‍താമസമില്ലാത്ത പറമ്പില്‍ സംഘം ചേര്‍ന്ന് മദ്യവും മയക്കുമരുന്നും ഉപയോഗിക്കുന്നത് ചോദ്യം ചെയ്ത വിരോധത്താല്‍ പ്രതികള്‍ മാരാകായുധങ്ങളുമായി കാരുമാത്ര സ്വദേശികളായ സന്ദിപീനേയും സുഹൃത്ത് സുബീഷിനേയും ആക്രമിച്ചുവെന്നാണ് കേസ്. ആക്രമണത്തില്‍ സുബീഷിന് തലക്കും കൈക്കും പരിക്ക് പറ്റി ഇപ്പോഴും ചികിത്സയിലാണ്. സംഭവത്തിനുശേഷം ഒളിവില്‍ പോയ പ്രതികളെ പോലിസ് തന്ത്രപൂര്‍വ്വം പിടികൂടുകയായിരുന്നു.

കേസ്സിലെ മറ്റു രണ്ട് പ്രതികളായ കാരുമാത്ര മേക്കാട്ടു വീട്ടില്‍ നന്ദുകൃഷ്ണന്‍, കാരുമാത്ര സ്വദേശി അവിണിപ്പിള്ളി വീട്ടില്‍ സംഗീതും ഇപ്പോള്‍ ഒളിവിലാണ്.തൃശ്ശൂര്‍ റൂറല്‍ എസ്പി ആര്‍ വിശ്വനാഥിന്റെ നിര്‍ദേശ പ്രകാരം ഇരിങ്ങാലക്കുട ഡിവൈഎസ്പി ഷാജി ജോസിന്റെ നേതൃത്വത്തില്‍ പ്രത്യേക അന്വേഷണ സംഘം രൂപികരിച്ചിരുന്നു. ഇരിങ്ങാലക്കുട എസ്എച്ച്ഒ അനീഷ് കരീമിന്റെ നേതൃത്വത്തിലുള്ള പോലിസാണ് അറസ്റ്റ് ചെയ്തത്. അന്വേഷണ സംഘത്തില്‍ എസ്‌ഐ പി ജി അനൂപ്,എഎസ്‌ഐമാരായ ക്ലീറ്റസ്,ജെസ്റ്റീന്‍,സിപിഒമാരായ വൈശാഖ് മംഗലന്‍,രഞ്ജിത്, ഷൗക്കര്‍ എന്നിവരും ഉണ്ടായിരുന്നു.