തദ്ദേശ തിരഞ്ഞെടുപ്പ്; തിരുവനന്തപുരം കോര്‍പ്പറേഷനിലേക്ക് കോണ്‍ഗ്രസ് രണ്ടാംഘട്ട സ്ഥാനാര്‍ത്ഥി പ്രഖ്യാപനം നടത്തി

തിരുവനന്തപുരം: തദ്ദേശ തിരഞ്ഞെടുപ്പില്‍ തിരുവനന്തപുരം കോര്‍പ്പറേഷനിലേക്ക് രണ്ടാംഘട്ട സ്ഥാനാര്‍ത്ഥി പ്രഖ്യാപനം നടത്തി കോണ്‍ഗ്രസ്. 15 സ്ഥാനാര്‍ഥികളെയാണ് പ്രഖ്യാപിച്ചത്. യൂത്ത് കോണ്‍ഗ്രസ് ജില്ലാ പ്രസിഡന്റ് നേമം ഷജീര്‍ നേമം ഡിവിഷനില്‍ സ്ഥാനാര്‍ത്ഥിയാകും. മുന്‍ എംഎല്‍എ കെ എസ് ശബരീനാഥന്‍ അടക്കം 48 പേരുടെ പട്ടികയാണ് ആദ്യം പുറത്തിറക്കിയത്.

രണ്ടാം ഘട്ട സ്ഥാനാര്‍ഥി പട്ടിക പുറത്തിറക്കിയതോടെ കോണ്‍ഗ്രസിന് 63 സീറ്റുകളിലേക്കുള്ള സ്ഥാനാര്‍ഥികളായി. ജി രവീന്ദ്രന്‍ നായര്‍(സൈനിക സ്‌കൂള്‍), പി ആര്‍ പ്രദീപ്(ഞാണ്ടൂര്‍കോണം), കെ ശൈലജ(ചെമ്പഴന്തി), വനജ രാജേന്ദ്രബാബു(മണ്ണന്തല), മണ്ണാമൂല രാജേഷ്(തുരുത്തുമ്മുല), വി മോഹനന്‍ തമ്പി(വലിയവിള), നേമം ഷജീര്‍(നേമം), ജി പത്മകുമാര്‍(മേലാംകോട്), ശ്രുതി എശ്(കാലടി), ഹേമ സി എസ്(കരുമം), ഐ രഞ്ജിനി(വെള്ളാര്‍), രേഷ്മ യു എസ്(കളിപ്പാന്‍കുളം), എ ബിനുകുമാര്‍(കമലേശ്വരം), കെ എസ് ജയകുമാരന്‍(ചെറുവയ്ക്കല്‍), വി ജി പ്രവീണ സുനില്‍(അലത്തറ) എന്നിവരാണ് രണ്ടാം ഘട്ട സ്ഥാനാര്‍ഥി പട്ടികയില്‍ ഇടം പിടിച്ചിരിക്കുന്നത്.

51 സീറ്റു നേടി നഗരഭരണം പിടിക്കുകയാണ് യുഡിഎഫ് ലക്ഷ്യം. എല്‍ഡിഎഫ് ഭരിക്കുന്ന കോര്‍പ്പറേഷനില്‍ മുഖ്യപ്രതിപക്ഷമായ ബിജെപിക്കും പിന്നിലാണ് കോണ്‍ഗ്രസ്. തലസ്ഥാനത്തുള്ള കോണ്‍ഗ്രസിന്റെ നിലമെച്ചപ്പെടുത്തുകയാണ് കെ എസ് ശബരിനാഥന്റെ സ്ഥാനാര്‍ഥിത്വത്തിലൂടെ കോണ്‍ഗ്രസ് ലക്ഷ്യമിടുന്നത്.

100 വാര്‍ഡുകളുള്ള കോര്‍പ്പറേഷനില്‍ 51 സീറ്റുകളാണ് എല്‍ഡിഎഫിനുള്ളത്. ബിജെപിക്ക് 34 അംഗങ്ങള്‍. പത്തിടത്താണ് കഴിഞ്ഞ തിരഞ്ഞെടുപ്പില്‍ യുഡിഎഫ് ജയിച്ചത്. ഇതില്‍ എട്ടെണ്ണമാണ് കോണ്‍ഗ്രസിന്റെ സീറ്റുകള്‍. 2025ലെ തദ്ദേശ തിരഞ്ഞെടുപ്പിനുള്ള നറുക്കെടുപ്പില്‍ 51 വനിതാ സംവരണ വാര്‍ഡുകളാണ് കോര്‍പറേഷനിലുള്ളത്. അഞ്ചു വാര്‍ഡുകള്‍ പട്ടികജാതി സ്ത്രീ സംവരണവും നാല് വാര്‍ഡുകള്‍ പട്ടികജാതി സംവരണവുമാണ്.