വിശാഖപ്പട്ടണത്ത് 12 മാവോവാദികള്‍ കീഴടങ്ങി

വിശാഖപ്പട്ടണം: പീപ്പിള്‍സ് ലിബറേഷന്‍ ആര്‍മിയില്‍ സജീവമായിരുന്ന പന്ത്രണ്ട് പേര്‍ ആന്ധ്രപ്രദേശ് പോലിസിനു മുന്നില്‍ കീഴടങ്ങി. ചിന്തപല്ലെ അസി. പോലിസ് സൂപ്രണ്ടിനു മുന്നിലായിരുന്നു കീഴടങ്ങല്‍. കീഴടങ്ങിയവര്‍ ഗോലികോണ്ട, പത്രുഡിഗുണ്ട അകുലുരു, രാമഗദ്ദ ഗ്രാമവാസികളാണ്.

തെറ്റായ വിവരങ്ങളുടെ അടിസ്ഥാനത്തില്‍ ഗ്രാമീണരെ ഒറ്റുകാരെന്ന് മുദ്രകുത്തി കൊലപ്പെടുത്തുന്നതില്‍ മനംമടുത്താണ് എല്ലാവരും കീഴടങ്ങാന്‍ തീരുമാനിച്ചതെന്ന് എഎസ്പി പറഞ്ഞു.

നക്‌സലുകളും ഗ്രാമീണരും പൊതുവില്‍ ജനങ്ങളും വികസനപ്രവര്‍ത്തനങ്ങളില്‍ പ്രചോദിതരാണെന്നും നക്‌സല്‍ പ്രവര്‍ത്തനങ്ങള്‍ അവരുടെ വികാസത്തിന് തടസ്സമാണെന്ന് കാണുന്നതുകൊണ്ടാണ് പൊതുധാരയിലേക്ക് കടന്നുവരുന്നത്. ജനങ്ങള്‍ മാവോവാദികളുടെ കൂടെ ചേരുന്നത് ഭീഷണി മൂലമാണെന്ന് കീഴടങ്ങിയവര്‍ പറഞ്ഞതായും എഎസ്പി അവകാശപ്പെട്ടു.