കിണറ്റില്‍ മനുഷ്യന്റെ അസ്ഥികൂടം; പോലിസ് അന്വേഷണം തുടങ്ങി

കണ്ണൂര്‍: ചെറുപുഴ കോലുവള്ളിക്ക് സമീപം സ്വകാര്യവ്യക്തിയുടെ പറമ്പിലെ കിണറില്‍ കണ്ടെത്തിയത് മനുഷ്യന്റെ അസ്ഥികൂടമെന്ന് സ്ഥിരീകരിച്ചു. കള്ളപ്പാത്തി റോഡരികില്‍ ഉപയോഗശൂന്യമായി കിടന്നിരുന്ന കിണറ്റിലാണ് അസ്ഥികൂടം കണ്ടെത്തിയത്. കഴിഞ്ഞ ദിവസം അസ്ഥികൂടമെന്ന് സംശയിക്കുന്ന വസ്തു കണ്ട വിവരമറിഞ്ഞ് ചെറുപുഴ പോലിസ് സ്ഥലത്തെത്തിയിരുന്നു.

പരിശോധന നടത്തിയെങ്കിലും വെളിച്ചക്കുറവുമൂലം തിങ്കളാഴ്ചത്തേയ്ക്ക് അന്വേഷണം മാറ്റുകയായിരുന്നു. ഇന്ന് കിണറിലെ വെള്ളം വറ്റിച്ച് പരിശോധന നടത്തി. ഫോറന്‍സിക് വിഭാഗവും പോലിസ് നായയും സ്ഥലത്തെത്തിയിരുന്നു. ചെളിയുള്ളതിനാല്‍ അതും നീക്കം ചെയ്താണ് അസ്ഥികൂടം പുറത്തെടുത്തത്. രണ്ടുമാസം മുമ്പ് അടയ്ക്ക ശേഖരിക്കാനെത്തിയവരാണ് ഇവ ആദ്യം കണ്ടതെങ്കിലും ഞായറാഴ്ചയാണ് ഇവര്‍ നാട്ടുകാരോട് വിവരം പറഞ്ഞത്. തുടര്‍ന്ന് നാട്ടുകാര്‍ പോലിസില്‍ വിവരം അറിയിച്ചു.

ചെറുപുഴ എസ്‌ഐ എം പി ഷാജിയുടെ നേതൃത്വത്തിലുള്ള സംഘം സ്ഥലത്തെത്തി പരിശോധന നടത്തിയാണ് അസ്ഥികൂടം മനുഷ്യന്റേത് തന്നെയെന്ന് സ്ഥിരീകരിച്ചത്. കിണറ്റില്‍ നിന്നും ചെരുപ്പും ഷര്‍ട്ടും ലഭിച്ചിട്ടുണ്ട്. പ്രദേശത്തു നിന്ന് ആരെയെങ്കിലും കാണാതായിട്ടുണ്ടോ എന്നതിനെക്കുറിച്ച് പോലിസ് അന്വേഷണം നടത്തിവരികയാണ്. മനുഷ്യ അസ്ഥികൂടം വിശദമായ പരിശോധനയ്ക്കായി അയച്ചിരിക്കുകയാണ്.