കര്‍ണാടകയില്‍ ബ്യാദ്ഗി മുളകിന്റെ വിലയില്‍ ചരിത്രകുതിപ്പ്, ക്വിന്റലിന് 89,999 രൂപ

വിജയപുര: കര്‍ണാടകയില്‍ ബ്യാദ്ഗി മുളകിന്റെ വിലയില്‍ ചരിത്രകുതിപ്പ്. സാധാരണയായി ഈ മുളകിന്റെ വില ക്വിന്റലിന് 35,000 മുതല്‍ 50,000 രൂപ വരെയാണ്. എന്നാല്‍ ഗുണനിലവാരത്തിലും ആവശ്യകതയിലുമുള്ള വര്‍ദ്ധനവ് കാരണം, ഇത്തവണ വില ചരിത്രത്തിലെ ഏറ്റവും ഉയര്‍ന്ന നിലയിലെത്തി.ഏകദേശം 89,999 രൂപയാണ് നിലവിലെ വില.

നേരത്തെ, ഫെബ്രുവരി 6 ന് ലക്കുണ്ടി ഗ്രാമത്തിലെ കര്‍ഷകര്‍ക്ക് 74,099 രൂപ വില ലഭിച്ചിരുന്നു. ഗദഗ്, ധാര്‍വാഡ്, ഹാവേരി ജില്ലകളില്‍ ബ്യാഡ്ഗി മുളക് വ്യാപകമായി കൃഷി ചെയ്യുന്നു.

മുംബൈ, ഹൈദരാബാദ് തുടങ്ങി രാജ്യത്തിന്റെ വിവിധ ഭാഗങ്ങളില്‍ നിന്നുള്ള വ്യാപാരികള്‍ വന്‍തോതില്‍ ബ്യാഡ്ഗി മുളക് വാങ്ങി മുളകുപൊടി നിര്‍മ്മാണ കമ്പനികള്‍ക്ക് വിതരണം ചെയ്യുന്നു.

അതേസമയം, ഉള്ളിയുടെ വില ക്വിന്റലിന് 800 രൂപയായി കുറഞ്ഞു, ഉല്‍പാദനച്ചെലവ് പോലും നികത്താന്‍ കഴിഞ്ഞില്ല. കഴിഞ്ഞ മണ്‍സൂണില്‍ ഉണ്ടായ കനത്ത മഴയും വെള്ളപ്പൊക്കവും വിളയുടെ 80% വും നശിപ്പിച്ചു, ഏകദേശം 31,000 ഹെക്ടര്‍ ഭൂമിയിലെ വിളകള്‍ നശിച്ചു.

ചിറ്റദുര്‍ഗ കഴിഞ്ഞാല്‍ സംസ്ഥാനത്തെ പ്രധാന ഉള്ളി ഉത്പാദന മേഖല വിജയപുര ജില്ലയാണ്, ബസവനബാഗേവാഡി, കോലാര്‍ താലൂക്കുകളിലാണ് കൂടുതല്‍ കൃഷിയും നടക്കുന്നത്. വിലവര്‍ദ്ധനവ് പ്രതീക്ഷിച്ചിരുന്നെങ്കിലും, വിപണിയിലെ വിലയിടിവ് കാരണം കര്‍ഷകര്‍ വീണ്ടും നഷ്ടം നേരിട്ടു.