മലക്കപ്പാറ വീരന്‍കുടി കോളനി നിവാസികളെ മാറ്റിപ്പാര്‍പ്പിച്ചു

ചാലക്കുടി: മഴ ശക്തിപ്രാപിച്ചതോടെ മണ്ണിടിച്ചില്‍ ഭീഷണി നിലനില്‍ക്കുന്ന ചാലക്കുടി, ആതിരപ്പിളളി പഞ്ചായത്തിലെ മലക്കപ്പാറ വീരന്‍കുടി കോളനി നിവാസികളെ പ്രദേശത്ത് നിന്ന് ഒഴിപ്പിച്ചു. മുഴുവന്‍ കോളനി നിവാസികളെയും മലക്കപ്പാറ പഞ്ചായത്ത് കമ്മ്യൂണിറ്റി ഹാളിലേയ്ക്കാണ് മാറ്റിയത്. പോലിസ്, ഫയര്‍ ആന്‍ഡ് റെസ്‌ക്യൂ ഉദ്യോഗസ്ഥരുടെ സഹായത്തോടെയാണ് ഇവരെ മാറ്റിയത്. ഏഴ് കുടുംബങ്ങളിലായി 23 പേരാണ് ഇവിടെ കഴിയുന്നത്. ഇതില്‍ 9 പുരുഷന്മാരും 7 സ്ത്രീകളും 7 കുട്ടികളുമാണ് ഉള്ളത്. ഇവര്‍ക്ക് ആവശ്യമുള്ള വസ്ത്രം, ഭക്ഷണസാധനങ്ങള്‍ എന്നിവയും അധികൃതരുടെ സഹായത്തോടെ എത്തിച്ചു നല്‍കുന്നുണ്ട്. മഴ തുടരുന്ന സാഹചര്യത്തില്‍ ചാലക്കുടിതാലൂക്ക്തലത്തിലും മഴക്കെടുതി നേരിടാന്‍ മുന്നൊരുക്കങ്ങള്‍ നടത്തിയിട്ടുണ്ട്. മണ്ണിടിച്ചില്‍, വെള്ളം കയറാന്‍ സാധ്യതയുള്ള സ്ഥലങ്ങളില്‍ എല്ലാം നിരീക്ഷണം ശക്തമാക്കിയിട്ടുണ്ട്.ആവശ്യഘട്ടങ്ങളില്‍ അടിയന്തര നടപടികള്‍ സ്വീകരിക്കാന്‍ ചാലക്കുടി താലൂക്ക് സജ്ജമാണെന്ന് തഹസില്‍ദാര്‍ ഇ എന്‍ രാജു അറിയിച്ചു.