ജോര്‍ദാന്‍-ഇസ്രായേല്‍ അതിര്‍ത്തിയില്‍ മലയാളി വെടിയേറ്റ് മരിച്ച സംഭവം: മൃതദേഹം നാട്ടില്‍ കൊണ്ടുവരാനുള്ള ചെലവ് കുടുംബം വഹിക്കണമെന്ന് എംബസി

തിരുവനന്തപുരം: ജോര്‍ദാനില്‍ നിന്നും ഇസ്രായേലിലേക്ക് കടക്കാന്‍ ശ്രമിക്കവേ വെടിയേറ്റു കൊല്ലപ്പെട്ട തുമ്പ സ്വദേശി തോമസ് ഗബ്രിയേല്‍ പേരേരയുടെ മൃതദേഹം നാട്ടില്‍ എത്തിക്കാനുള്ള ചെലവ് കുടുംബം തന്നെ വഹിക്കണമെന്ന് ഇന്ത്യന്‍ എംബസി. പെരേരയുടെ ഭാര്യയ്ക്ക് അയച്ച കത്തിലാണ് എംബസി ഇക്കാര്യം അറിയിച്ചിരിക്കുന്നത്. തലയില്‍ വെടിയേറ്റാണ് പെരേരയുടെ മരണമെന്ന് എംബസി സ്ഥിരീകരിച്ചിട്ടുണ്ട്. ജോര്‍ദാന്‍ അധികൃതര്‍ നല്‍കിയ അദ്ദേഹത്തിന്റെ സാമഗ്രികള്‍ ഇന്ന് എംബസി ഉദ്യോഗസ്ഥര്‍ സ്വീകരിക്കും.

മൃതദേഹം ജോര്‍ദാനില്‍ നിന്ന് നാട്ടില്‍ എത്തിക്കാനുള്ള ചെലവ് കേന്ദ്ര സര്‍ക്കാര്‍ വഹിക്കണമെന്നാവശ്യപ്പെട്ട് അടൂര്‍ പ്രകാശ് എംപി വിദേശകാര്യ മന്ത്രിക്ക് കത്തു നല്‍കിയിട്ടുണ്ട്.ഇസ്രയേലിലേക്കുള്ള തൊഴില്‍ വിസ വാഗ്ദാനം ചെയ്ത് നാട്ടില്‍ നിന്ന് കൊണ്ടുപോയ ഏജന്‍സി പെരേര അടക്കമുള്ളവരെ കബളിപ്പിക്കുകയായിരുന്നെന്നാണ് വിവരം. ഇവര്‍ക്ക് ജോര്‍ദാനിലേക്കുള്ള മൂന്ന് മാസത്തെ സന്ദര്‍ശക വിസയാണ് ഉണ്ടായിരുന്നത്. ഫെബ്രുവരി അഞ്ചിനാണ് ഇവര്‍ ജോര്‍ദാനിലേക്ക് പോയത്. ഫെബ്രുവരി പത്തിന് ഇസ്രയേല്‍ അതിര്‍ത്തി കടക്കാന്‍ ശ്രമിച്ചപ്പോഴായിരുന്നു ജോര്‍ദാന്‍ സേന വെടിവച്ചത്.