സര്‍ക്കാര്‍ ഭൂമി കൈയ്യേറി റിസോര്‍ട്ട് നിര്‍മാണമെന്ന്; മാത്യു കുഴല്‍നാടനെതിരെ ഇഡി

കൊച്ചി: ഇടുക്കി ചിന്നക്കനാലില്‍ റിസോര്‍ട്ട് നിര്‍മാണത്തിനായി സര്‍ക്കാര്‍ ഭൂമി കൈയ്യേറിയെന്ന കേസില്‍ മാത്യു കുഴല്‍നാടന്‍ എംഎല്‍എക്കെതിരെ ഇഡി അന്വേഷണം. സര്‍ക്കാര്‍ ഭൂമി അനധികൃതമായി കൈവശം വച്ചെന്ന് ആരോപിച്ച് മാത്യു കുഴല്‍നാടനും സുഹൃത്തുക്കള്‍ക്കുമെതിരെ റെവന്യു വകുപ്പ് കേസെടുത്തിരുന്നു. സംഭവത്തില്‍ വിജിലന്‍സ് അന്വേഷണം നടക്കുന്നതിന് പിന്നാലെയാണ് ഇഡിയും രംഗത്തെത്തിയിരിക്കുന്നത്.

ഭൂമി വാങ്ങിയതുമായി ബന്ധപ്പെട്ട ഇടപാടില്‍ കള്ളപ്പണം ഉപയോഗിച്ചിട്ടുണ്ടോ എന്നാണ് പ്രധാനമായും ഇഡി അന്വേഷിക്കുക. ഇതിനായി കേസുമായി ബന്ധപ്പെട്ട രേഖകള്‍ വിജിലന്‍സില്‍ നിന്ന് ശേഖരിച്ചിട്ടുണ്ട്. ഏത് അന്വേഷണത്തിനും തയാറാണെന്നും ഇഡി അന്വേഷണത്തെ സ്വാഗതം ചെയ്യുന്നുവെന്നും മാത്യു കുഴല്‍നാടന്‍ പ്രതികരിച്ചു. 2012ലാണ് ചിന്നക്കനാലില്‍ ഒരേക്കറോളം സ്ഥലം വാങ്ങി അടുത്തുള്ള 50 സെന്റ് സര്‍ക്കാര്‍ ഭൂമി കൂടി കൂട്ടിച്ചേര്‍ത്തത്. പിന്നീടാണ് ഈ ഭൂമി മാത്യു കുഴല്‍നാടന്‍ അടക്കമുള്ള സംഘം വാങ്ങിയത്. ഇവിടെ ചട്ടങ്ങള്‍ ലംഘിച്ച് കെട്ടിടം നിര്‍മിച്ചതിനും കേസുണ്ട്.