പ്രവാചകനെ അപകീര്‍ത്തിപ്പെടുത്തുന്നത് എല്ലാ മുസ്‌ലിംകളെയും അപകീര്‍ത്തിപ്പെടുത്തുന്നതിന് തുല്യം: ഇറാന്‍ പ്രസിഡന്റ് ഹസന്‍ റൂഹാനി

ടെഹ്റാന്‍: പ്രവാചകനെ അപകീര്‍ത്തിപ്പെടുത്തുന്നത് എല്ലാ മുസ്‌ലിംകളെയും അപകീര്‍ത്തിപ്പെടുത്തുന്നതിന് തുല്യമാണെന്ന് ഇറാന്‍ പ്രസിഡന്റ് ഹസന്‍ റൂഹാനി. മുഹമ്മദ് നബിയെ ചിത്രീകരിക്കുന്ന കാര്‍ട്ടൂണുകള്‍ക്ക് പാശ്ചാത്യര്‍ പിന്തുണ നല്‍കുന്നത് അനീതിയാണെന്നും മുസ്ലിംകളെ അപമാനിക്കുന്നതാണെന്നും അദ്ദേഹം കൂട്ടിച്ചേര്‍ത്തു. സ്വാതന്ത്ര്യത്തോടൊപ്പം മൂല്യങ്ങളോടുള്ള ആദരവും ധാര്‍മ്മിക പരിഗണനയും ഉണ്ടായിരിക്കണമെന്ന് ബുധനാഴ്ച നടന്ന മന്ത്രിസഭാ യോഗത്തില്‍ പ്രസിഡന്റ് പറഞ്ഞു.

പ്രവാചകനെ അപകീര്‍ത്തിപ്പെടുത്തുന്നത് എല്ലാ പ്രവാചകന്മാരെയും മനുഷ്യമൂല്യങ്ങളെയും അപകീര്‍ത്തിപ്പെടുത്തുകയും ധാര്‍മികതയെ ദുര്‍ബലപ്പെടുത്തുകയും ചെയ്യുമെന്നും അദ്ദേഹം പറഞ്ഞു. പ്രവാചകനെ മുസ്ലിംകള്‍ വളരെയധികം ബഹുമാനിക്കുന്നു, അദ്ദേഹത്തെക്കുറിച്ചുള്ള ഏതെങ്കിലും തരത്തിലുള്ള ചിത്രീകരണം ഇസ്ലാമില്‍ നിരോധിച്ചിരിക്കുന്നു. സംശയാസ്പദമായ ഫ്രഞ്ച് കാരിക്കേച്ചറുകളെ മുസ്ലിംകള്‍ കുറ്റകരവും ഇസ്ലാമോഫോബിക് ആയും കാണാന്‍ ഇതാണ് കാരണമെന്നും അദ്ദേഹം പറഞ്ഞു.