യുഡിഎഫ് സ്ഥാനാര്‍ഥിയുടെ മരണം; മലപ്പുറം മൂത്തേടം പഞ്ചായത്തിലെ ഏഴാം വാര്‍ഡില്‍ തിരഞ്ഞെടുപ്പ് മാറ്റിവച്ചു

മലപ്പുറം: തിരഞ്ഞെടുപ്പ് പ്രചാരണം കഴിഞ്ഞ് വീട്ടിലെത്തിയ സ്ഥാനാര്‍ഥി കുഴഞ്ഞുവീണു മരിച്ച സംഭവത്തില്‍ മലപ്പുറം മൂത്തേടം പഞ്ചായത്ത് പായിമ്പാടം ഏഴാം വാര്‍ഡിലെ തിരഞ്ഞെടുപ്പ് മാറ്റിവച്ചു. യുഡിഎഫ് സ്ഥാനാര്‍ഥി വട്ടത്ത് ഹസീന(49)യാണ് ഇന്നലെ രാത്രി കുഴഞ്ഞുവീണ് മരിച്ചത്. പായിമ്പാടം അങ്കണവാടി അധ്യാപികയാണ് ഹസീന. മുസ്‌ലിം ലീഗ് സ്ഥാനാര്‍ഥിയായിരുന്നു.

പ്രചരണത്തിന്റെ ഭാഗമായി വീടുകള്‍ കയറി വോട്ടു ചോദിക്കുന്നതിലും കുടുംബയോഗങ്ങളിലും സജീവമായി പങ്കെടുത്തിരുന്നു. രാത്രി വരെ നീണ്ട പ്രചാരണത്തിനു ശേഷം വീട്ടിലെത്തിയ ഹസീന 11.15ഓടെ നെഞ്ചുവേദനയെ തുടര്‍ന്ന് കുഴഞ്ഞുവീഴുകയായിരുന്നു. ഉടന്‍ എടക്കരയിലെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും ജീവന്‍ രക്ഷിക്കാനായില്ല. ഭര്‍ത്താവ്: അബ്ദുറഹിമാന്‍.