പേരാമ്പ്രയില്‍ സിപിഎം പ്രവര്‍ത്തകന് വെട്ടേറ്റു

കോഴിക്കോട്: പേരാമ്പ്രയില്‍ സിപിഎം പ്രവര്‍ത്തകന് വെട്ടേറ്റു. ദിനേശന്‍ എന്നയാളെയാണ് പേരാമ്പ്ര മുതുവണ്ണാച്ചയില്‍ വച്ച് മൂന്നംഗ സംഘം ആക്രമിച്ചത്. ദിനേശന്‍ കുറ്റ്യാടിയിലെ കട അടച്ച് മടങ്ങവെയാണ് ആക്രമണം. തലയ്ക്കും കൈകള്‍ക്കും പരിക്കേറ്റ ദിനേശനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

പേരാമ്പ്രയില്‍ പൂജാദ്രവ്യങ്ങള്‍ വില്‍ക്കുന്ന കട നടത്തിവരികയായിരുന്നു ദിനേശന്‍. രാത്രി കടയടച്ച് മടങ്ങവേ ബൈക്കിലെത്തിയ സംഘം വെട്ടുകയായിരുന്നു. ഉടന്‍ തന്നെ ഇദ്ദേഹത്തെ ആശുപത്രിയില്‍ പ്രവേശിപ്പിച്ചു. ആക്രമണത്തില്‍ ദിനേശന് ഗുരുതരമായി പരിക്കേറ്റു. ആദ്യം ഇദ്ദേഹത്തെ പേരാമ്പ്രയിലെ സ്വകാര്യ ആശുപത്രിയിലാണ് പ്രവേശിപ്പിച്ചതെങ്കിലും പരിക്കുകള്‍ ഗുരുതരമെന്ന് കണ്ടതോടെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റുകയായിരുന്നു. സംഭവത്തില്‍ പോലിസ് അന്വേഷണം ആരംഭിച്ചിട്ടുണ്ട്.

കുറച്ച് നാളുകള്‍ക്ക് മുന്‍പ് ബിജെപി-സിപിഎം സംഘര്‍ഷമുണ്ടായ പ്രദേശത്ത് തന്നെയാണ് ഇന്നും ആക്രമണമുണ്ടായത്. ബിജെപി പ്രവര്‍ത്തകരെ ആക്രമിച്ച കേസിലെ പ്രതി കൂടിയാണ് ദിനേശന്‍. ബിജെപി പ്രവര്‍ത്തകര്‍ ഇതിന് പകരം ചോദിക്കാന്‍ നടത്തിയ ആക്രമണമാണിതെന്ന് ആരോപണമുയരുന്നുണ്ട്.