കോണ്‍ഗ്രസുകാര്‍ക്കൊപ്പം ചേര്‍ന്ന് പോലിസുകാരെ ആക്രമിച്ചെന്ന്; ടി സിദ്ദിഖ് എംഎല്‍എയുടെ ഗണ്‍മാനെ സസ്‌പെന്‍ഡ് ചെയ്തു

തിരുവനന്തപുരം: വയനാട്ടില്‍ രാഹുല്‍ ഗാന്ധിയുടെ ഓഫിസ് തകര്‍ത്തതിനെതിരേ നടന്ന സമരത്തിനിടെ കോണ്‍ഗ്രസ് പ്രവര്‍ത്തകര്‍ക്കൊപ്പം ചേര്‍ന്ന് പോലിസുകാരെ ആക്രമിച്ചെന്നാരോപിച്ച് ടി സിദ്ദിഖ് എംഎല്‍എയുടെ ഗണ്‍മാന്‍ കെവി സ്മിബിനെ സസ്‌പെന്‍ഡ് ചെയ്തു. സ്മിബിന്‍ പോലിസുകാരെ ആക്രമിച്ചുവെന്ന കണ്ടെത്തലിനെ തുടര്‍ന്നാണ് നടപടി. ഇന്നലെ കല്‍പ്പറ്റയില്‍ കോണ്‍ഗ്രസ് നടത്തിയ പ്രതിഷേധസമരത്തിനിടെയാണ് എംഎല്‍എയുടെ ഗണ്‍മാനായ സ്മിബിന്‍ പോലിസുകാരുമായി തര്‍ക്കിക്കുന്നുണ്ടായിരുന്നു. ഇതിന്റെ ദൃശ്യങ്ങള്‍ പുറത്തുവന്നതിന് പിന്നാലെ ഇയാള്‍ക്കെതിരെ നടപടി വേണമെന്നാവശ്യപ്പെട്ട് സിപിഎം രംഗത്തെത്തിയിരുന്നു.

''സിദ്ദിഖിനൊരു ഗണ്‍മാനുണ്ട്. ഗണ്‍മാന്‍ യൂണിഫോമില്‍ നില്‍ക്കുന്ന പോലിസുക്കാരെ തള്ളിമാറ്റുന്ന ദൃശ്യങ്ങളാണ് പുറത്തുവന്നത്. ഗണ്‍മാന്‍ യൂനിഫോമില്‍ അല്ല. സ്ഥലത്ത് സിദ്ധീഖില്ല. തനി കോണ്‍ഗ്രസുകാരന്റെ രീതിയിലാണ് യൂനിഫോമിലുള്ള പോലിസുകാരെ തള്ളിമാറ്റുന്നത്. ഗൗരവമേറിയ പ്രശ്‌നമാണ്.''-എന്നായിരുന്നു സിപിഎം നേതാക്കളുടെ വാക്കുകള്‍.