കോഴിക്കോട്ട് ചികില്‍സാ പിഴവിനെത്തുടര്‍ന്ന് വീട്ടമ്മ മരിച്ചതായി പരാതി

കോഴിക്കോട്: കോഴിക്കോട് മെഡിക്കല്‍ കോളജ് ആശുപത്രിയില്‍ ചികില്‍സാ പിഴവിനെത്തുടര്‍ന്ന് വീട്ടമ്മ മരിച്ചതായി ആരോപണം. കൂടരഞ്ഞി സ്വദേശി സിന്ധു (45) ആണ് മരിച്ചത്. പനി ബാധിച്ചതിനെ തുടര്‍ന്ന് ബുധനാഴ്ച വൈകീട്ടാണ് സിന്ധുവിനെ ആശുപത്രിയില്‍ പ്രവേശിപ്പിച്ചത്.

കുത്തിവയ്പ്പ് എടുത്തയുടന്‍ യുവതി മരിക്കുകയായിരുന്നുവെന്ന് ബന്ധുക്കള്‍ ആരോപിച്ചു. മരുന്ന് മാറി കുത്തിവച്ചതാണ് സിന്ധു മരിക്കാന്‍ കാരണമായതെന്ന് ഭര്‍ത്താവ് രഘു പോലിസില്‍ നല്‍കിയ പരാതിയില്‍ പറയുന്നു. പരാതിയിന്‍മേല്‍ കോഴിക്കോട് മെഡിക്കല്‍ കോളജ് ആശുപത്രിക്കെതിരേ പോലിസ് കേസെടുത്തു.