പിണറായി വിജയനെതിരെ അശ്ലീലച്ചുവയുള്ള വിഡിയോ: ക്രൈം നന്ദകുമാറിനെതിരേ കേസ്

കൊച്ചി: മുഖ്യമന്ത്രി പിണറായി വിജയനെതിരെ അശ്ലീലച്ചുവയുള്ള വിഡിയോ പ്രചരിപ്പിച്ച ക്രൈം നന്ദകുമാറിനെതിരെ കേസെടുത്തു. ബിഎന്‍എസ് 192, ഐടി നിയമത്തിലെ 67, 67എ വകുപ്പുകള്‍ പ്രകാരം കൊച്ചി സൈബര്‍ പോലിസാണ് കേസെടുത്തിരിക്കുന്നത്. നിയമവിരുദ്ധമായ പ്രവൃത്തിയിലൂടെ കലാപം ലക്ഷ്യമിട്ട് പ്രകോപനമുണ്ടാക്കുന്നതിന് എതിരെ ചുമത്തുന്ന വകുപ്പാണ് ബിഎന്‍എസിലെ 192 വകുപ്പ്. ഇന്നലെ യുട്യൂബിലും സമൂഹ മാധ്യമങ്ങളിലും പങ്കുവച്ച വിഡിയോ ആണ് കേസിനു കാരണമെന്നു സൈബര്‍ പോലിസ് അറിയിച്ചു. രാഹുല്‍ മാങ്കൂട്ടത്തില്‍ വിഷയത്തില്‍ മുഖ്യമന്ത്രി പ്രകടിപ്പിച്ച അഭിപ്രായങ്ങളോടുള്ള പ്രതികരണമെന്ന മട്ടിലാണ് വിഡിയോ. രാഷ്ട്രീയ എതിരാളികളെ ഒതുക്കാന്‍ മുഖ്യമന്ത്രി വിവിധ മാര്‍ഗങ്ങള്‍ സ്വീകരിച്ചെന്നാണ് ആരോപണങ്ങള്‍. സോളര്‍ കേസ് പ്രതിയായ വനിതയുമായി ബന്ധപ്പെടുത്തിയും വിഡിയോയില്‍ പരാമര്‍ശങ്ങളുണ്ട്.