സഭയില്‍ ബോഡിഷെയിമിങ്; പ്രതിപക്ഷ എംഎല്‍എയെ അധിക്ഷേപിച്ച് മുഖ്യമന്ത്രി

തിരുവനന്തപുരം: പ്രതിപക്ഷ എംഎല്‍എയെ അധിക്ഷേപിച്ച് മുഖ്യമന്ത്രി പിണറായി വിജയന്‍. പ്രതിപക്ഷ എംഎല്‍എയുടെ ഉയരക്കുറവിനെയാണ് മുഖ്യമന്ത്രി പരിഹസിച്ചത്. എട്ടുമുക്കാലട്ടി വച്ചപോലെ എന്നു പറഞ്ഞായിരുന്നു അധിക്ഷേപം. സ്വന്തം ശരീരശേഷി നോക്കാതെയാണ് സ്പീക്കറെ ആക്രമിക്കാന്‍ മുതിര്‍ന്നതെന്നും മുഖ്യമന്ത്രി പറഞ്ഞു. ആരു തെറ്റു ചെയ്താലും മുഖം നോക്കാതെ നടപടിയെടുക്കുമെന്നും മുഖ്യമന്ത്രി പറഞ്ഞു.

സ്വര്‍ണപ്പാളി വിവാദത്തിലുണ്ടായ പ്രതിപക്ഷ ബഹളത്തിനൊടുവിലാണ് മുഖ്യമന്ത്രിയുടെ പരാമര്‍ശം. അതേസമയം, പ്രതിപക്ഷ പ്രതിഷേധത്തെതുടര്‍ന്ന് സഭ നിര്‍ത്തിവച്ചു. ദേവസ്വം മന്ത്രി രാജിവക്കണമെന്ന് പ്രതിപക്ഷ നേതാവ് വി ഡി സതീശന്‍ ആവശ്യപ്പെട്ടു. നടുത്തളത്തിലിറങ്ങിയ പ്രതിപക്ഷം സ്പീക്കറുടെ മുഖം മറച്ച് ബാനര്‍ ഉയര്‍ത്താന്‍ ശ്രമിക്കുകയായിരുന്നു. പ്രതിപക്ഷ പ്രതിഷേധം അതിരുവിട്ടുവെന്ന് മുഖ്യമന്ത്രി പിണറായി വിജയന്‍ പറഞ്ഞു. സ്പീക്കറുടെ മുഖം മറച്ച പ്രതിഷേധം ഇതാദ്യമാണ്. പലതരം പ്രതിഷേധങ്ങള്‍ ഉണ്ടായിട്ടുണ്ടെന്നും അദ്ദേഹം വ്യക്തമാക്കി. എന്തിനും മറുപടി പറയാന്‍ സര്‍ക്കാര്‍ തയ്യാറാണെന്നും മുഖ്യമന്ത്രി പറഞ്ഞു.

അതേസമയം, മുഖ്യമന്ത്രിയുടെ പരാമര്‍ശം സഭാരേഖകളില്‍നിന്നു നീക്കാന്‍ പ്രതിപക്ഷം സ്പീക്കറോട് ആവശ്യപ്പെടുമെന്നാണ് വിവരം. സഭയിലെ ബോഡിഷെമിങ്ങിനെതിരേ ശക്തമായി പ്രതിഷേധിക്കുമെന്നും പ്രതിപക്ഷം വ്യക്തമാക്കി.