ഇന്ധന വിലവര്‍ധനയ്ക്ക് കാരണം താലിബാനെന്ന് ബിജെപി എംഎല്‍എ

ബെംഗളൂരു: അഫ്ഗാനില്‍ താലിബാന്‍ അധികാരം പിടിച്ചതാണ് ഇന്ത്യയിലെ ഇന്ധനവില വര്‍ധനക്ക് കാരണമെന്ന് കര്‍ണാടക ബിജെപി എംഎല്‍എ. അഫ്ഗാനില്‍ താലിബാന്‍ അധികാരം പിടിച്ചത് ആഗോളതലത്തില്‍ വിലവര്‍ധനക്ക് കാരണമായെന്നും അതോടെയാണ് ഇന്ത്യയില്‍ ഡീസലിനും പെട്രോളിനും വില വര്‍ധിച്ചതെന്നും എംഎല്‍എ ആരോപിച്ചു.

ഹുബ്ലി- ധാര്‍വാഡിലെ എംഎല്‍എ അരവിന്ദ ബെല്ലാഡ് ആണ് ഇന്ധനവിലവര്‍ധനക്ക് കാരണം അഫ്ഗാനിലെ താലിബാനാണെന്ന് ആരോപിച്ചത്.

താലിബാന്‍ ഭരണം പിടിച്ചതുവഴി ആഗോള എണ്ണയുടെ വില കൂടിയെന്നും അതാണ് രാജ്യത്തെ എണ്ണവില വര്‍ധനക്ക് കാരണമെന്നും അദ്ദേഹം അവകാശപ്പെടുന്നു.

രാജ്യത്ത് പല സംസ്ഥാനങ്ങിലും പെട്രോള്‍ വില 100 ആയി ഉയര്‍ന്നിട്ടുണ്ട്. ഡല്‍ഹിയില്‍ പെട്രോള്‍ ലിറ്ററിന് 101.3 രൂപയാണ്. ഡീസല്‍ 88.7 രൂപ. മുംബൈയില്‍ 107.39 രൂപയും ഡീസല്‍ 96.33 രൂപയുമായിട്ടുണ്ട്.