ബിജെപി കുഴല്‍പ്പണക്കേസ്; കവര്‍ച്ചക്ക് ശേഷം ധര്‍മരാജന്‍ കെ സുരേന്ദ്രന്റെ മകനെ വിളിച്ചു

തൃശൂര്‍: കൊടകരയിലെ ബിജെപി കുഴല്‍പ്പണക്കേസില്‍ കവര്‍ച്ചക്ക് ശേഷം ധര്‍മരാജന്‍ ബിജെപി സംസ്ഥാന പ്രസിഡന്റ് കെ സുരേന്ദ്രന്റെ മകനെ വിളിച്ചതായി പോലിസിന് വിവരം ലഭിച്ചു. ഇതുള്‍പ്പടെ 7 ബിജെപി നേതാക്കളുമായിട്ടാണ് സംസാരിച്ചത്. ധര്‍മരാജന്റെ ഫോണ്‍ രേഖകള്‍ വിശദമായി പരിശോധിച്ചതില്‍ നിന്നാണ് ഈ വിവരം ലഭിച്ചത്. കവര്‍ച്ചക്കു ശേഷം ധര്‍മരാജന്‍ ആദ്യം വിളിച്ചത് ബിജെപി സംസ്ഥാന സെക്രട്ടറി എ നാഗേഷിനെയാണ്. മകന്റെ ഫോണിലൂടെ കെ സുരേന്ദ്രനുമായിട്ടാണോ സംസാരിച്ചത് എന്ന സംശയവും ഉയരുന്നുണ്ട്.

ബിജെപി സംസ്ഥാന സെക്രട്ടറി എ നാഗേഷിന്റെ പ്രവര്‍ത്തന മണ്ഡലമാണ് കൊടകര ഉള്‍പ്പെടുന്ന പ്രദേശം. തൃശൂരില്‍ കെ. സുരേന്ദ്രന്റെ വലംകൈ കൂടിയാണ് നാഗേഷ്. ഇക്കാര്യങ്ങളെല്ലാം നിരത്തിയാണ് അന്വേഷണം പുരോഗിക്കുന്നത്. നാഗേഷിനെ വിളിച്ചെങ്കിലും ഫോണെടുത്തില്ല. തൊട്ടുപിറകെയാണ് കെ സുരേന്ദ്രന്റെ മകന്‍ ഹരികൃഷ്ണന്റെ ഫോണിലേക്കു വിളിച്ച് ധര്‍മരാജന്‍ സംസാരിച്ചത്.