അട്ടപ്പാടിയില്‍ വീണ്ടും നവജാതശിശു മരണം

പാലക്കാട്: അട്ടപ്പാടിയില്‍ വീണ്ടും നവജാതശിശു മരണം. കാരറ കതിരംപതി ഊരിലെ മണിയന്‍- പുഷ്പ ദമ്പതിമാരുടെ പെണ്‍കുഞ്ഞാണ് മരിച്ചത്. തൃശൂര്‍ മെഡിക്കല്‍ കോളജ് ആശുപത്രിയില്‍ ബുധനാഴ്ച വൈകീട്ടാണ് കുഞ്ഞ് മരിച്ചത്. ഏഴാം മാസത്തിലായിരുന്നു പ്രസവം.

കുഞ്ഞിന് ഒരുകിലോ മാത്രമായിരുന്നു തൂക്കം. ഉയര്‍ന്ന രക്തസമ്മര്‍ദ്ദത്തെത്തുടര്‍ന്ന് അഗളി സ്വകാര്യാശുപത്രിയില്‍നിന്ന് തിങ്കളാഴ്ച പുഷ്പയെ തൃശൂര്‍ മെഡിക്കല്‍ കോളജിലേക്ക് മാറ്റുകയായിരുന്നു. അട്ടപ്പാടിയില്‍ ഈ വര്‍ഷം ഇതുവരെ 12 നവജാതശിശുക്കളും മൂന്ന് ശിശുക്കളുമാണ് മരിച്ചത്.