അനില്‍ അംബാനി-ആര്‍കോം ബാങ്ക് തട്ടിപ്പ് അന്വേഷണം: സിബിഐ, ഇഡി എന്നിവയില്‍ നിന്ന് റിപോര്‍ട്ട് തേടി സുപ്രിംകോടതി

ന്യൂഡല്‍ഹി: റിലയന്‍സ് കമ്മ്യൂണിക്കേഷന്‍സ് (ആര്‍സിഒഎം), അതിന്റെ ഗ്രൂപ്പ് സ്ഥാപനങ്ങള്‍, അനില്‍ അംബാനി എന്നിവര്‍ നടത്തിയ വന്‍തോതിലുള്ള ബാങ്ക് തട്ടിപ്പ് ആരോപണങ്ങള്‍ ഉള്‍പ്പെട്ട കേസില്‍ അന്വേഷണ പുരോഗതി സംബന്ധിച്ച സ്റ്റാറ്റസ് റിപോര്‍ട്ടുകള്‍ സമര്‍പ്പിക്കാന്‍ സിബിഐക്കും ഇഡിക്കും നിര്‍ദേശംനല്‍കി സുപ്രിംകോടതി.

കേസില്‍ കോടതി മേല്‍നോട്ടത്തില്‍ അന്വേഷണം ആവശ്യപ്പെട്ട് മുന്‍ കേന്ദ്ര സെക്രട്ടറി ഇ എ എസ് ശര്‍മ്മ സമര്‍പ്പിച്ച ഹരജിയിലാണ് ചീഫ് ജസ്റ്റിസ് സൂര്യകാന്ത് , ജസ്റ്റിസ് ജോയ്മല്യ ബാഗ്ചി എന്നിവരടങ്ങിയ ബെഞ്ച് ഉത്തരവ് പുറപ്പെടുവിച്ചത്.

വലുതും സങ്കീര്‍ണ്ണവുമാണ് ഈ കേസില്‍ ഉള്‍പ്പെട്ടിരിക്കുന്ന കോര്‍പ്പറേറ്റ് തട്ടിപ്പിന്റെ തോത് എന്ന് ശര്‍മ്മയെ പ്രതിനിധീകരിച്ച് അഭിഭാഷകന്‍ പ്രശാന്ത് ഭൂഷണ്‍ ഇന്ന് വാദിച്ചു .ഈ സബ്മിഷനെ എതിര്‍ക്കുന്നില്ലെന്ന് സോളിസിറ്റര്‍ ജനറല്‍ ഓഫ് ഇന്ത്യ (എസ്ജി) തുഷാര്‍ മേത്ത മറുപടി നല്‍കി, എന്നാല്‍ വിഷയത്തില്‍ ഇതിനകം ഒരു ക്രിമിനല്‍ കേസ് രജിസ്റ്റര്‍ ചെയ്തിട്ടുണ്ടെന്നും സിബിഐ അത് അന്വേഷിച്ചുകൊണ്ടിരിക്കുകയാണെന്നും ചൂണ്ടിക്കാട്ടി.

എന്നിരുന്നാലും, സിബിഐയുടെ പ്രഥമ വിവര റിപോര്‍ട്ടില്‍ (എഫ്ഐആര്‍) ചില കാര്യങ്ങളില്‍ കുറവുണ്ടെന്ന് ഭൂഷണ്‍ വാദിച്ചു. ഈ വിഷയത്തില്‍ സിബിഐയും ഇഡിയും നടത്തുന്ന അന്വേഷണത്തിന്റെ സ്റ്റാറ്റസ് റിപോര്‍ട്ട് തേടണമെന്ന് അദ്ദേഹം കോടതിയോട് ആവശ്യപ്പെട്ടു.