കോട്ടയ്ക്കലില്‍ നിയന്ത്രണംവിട്ട ലോറി വാഹനങ്ങളിലിടിച്ച് പാടത്തേക്ക് മറിഞ്ഞു

കോട്ടയ്ക്കല്‍: പുത്തൂരില്‍ ചരക്ക് ലോറി ഏഴു വാഹനങ്ങളില്‍ ഇടിച്ച് പാടത്തേക്ക് മറിഞ്ഞു. അപകടത്തില്‍ 11 മാസം പ്രായമുള്ള കുഞ്ഞ് ഉള്‍പ്പെടെ വിവിധ വാഹനങ്ങളിലെ യാത്രക്കാരായ പത്തുപേര്‍ക്ക് പരിക്കേറ്റു. ഇതില്‍ ഒരാളുടെ പരിക്ക് ഗുരുതരമാണ്. പൊന്മുണ്ടം സ്വദേശികളായ ഖദീജ(42) മിസ്രിയ(23) ഫസലുല്‍ റഹ്മാന്‍(27) ഹാസിന്‍ സയാന്‍(11 മാസം) മഞ്ചേരി തൃപ്പനച്ചി സ്വദേശികളായ ഉണ്ണികൃഷ്ണന്‍(56) ദിലീപ്(40) പ്രജിലേഷ്(45) കരിങ്കപ്പാറ സ്വദേശി അബ്ദുള്‍സലാം(52) പുത്തൂര്‍ സ്വദേശികളായ ബഷീര്‍, റാഷിദ(43) എന്നിവര്‍ക്കാണ് പരിക്കേറ്റത്. ഇതില്‍ പ്രജിലേഷിനാണ് ഗുരുതരമായ പരിക്കേറ്റിട്ടുള്ളത്. പെരിന്തല്‍മണ്ണ ഭാഗത്തുനിന്ന് കോട്ടയ്ക്കലിലേക്ക് വരികയായിരുന്ന ചരക്ക് ലോറിയാണ് പീസ് സ്‌കൂളിന് സമീപത്തുവെച്ച് നിയന്ത്രണംവിട്ടത്. തുടര്‍ന്ന് മൂന്ന് കാറുകളിലും നാല് ബൈക്കുകളിലും ഇടിച്ചശേഷം പാടത്തേക്ക് മറിയുകയായിരുന്നു.