തിരുവനന്തപുരത്ത് ഭാര്യയെ ഭര്‍ത്താവ് വെട്ടിക്കൊന്നു

തിരുവനന്തപുരം: മദ്യപിച്ചെത്തിയ ഭര്‍ത്താവ് ഭാര്യയെ വെട്ടിക്കൊന്നു. നേമം കല്ലിയൂര്‍ സ്വദേശിയായ ബിന്‍സിയാണ് മരിച്ചത്. വ്യാഴാഴ്ച പുലര്‍ച്ചെ രണ്ട് മണിയോടെയാണ് യുവതി കൊല്ലപ്പെട്ടത്. ഹരിത കര്‍മ്മ സേനാംഗമായ ബിന്‍സി ജോലിക്കെത്താത്തതിനെ തുടര്‍ന്ന് അന്വേഷിച്ചെത്തിയപ്പോഴാണ് കഴുത്തിന് വെട്ടേറ്റ് രക്തത്തില്‍ കുളിച്ച നിലയില്‍ കണ്ടെത്തിയത്. തുടര്‍ന്ന് ശാന്തിവിളയിലെ ആശുപത്രിയില്‍ എത്തിച്ചെങ്കിലും മരണം സ്ഥിരീകരിച്ചിരുന്നു.

കെട്ടിട നിര്‍മാണ തൊഴിലാളിയായ സുനില്‍ സ്ഥിരം മദ്യപാനിയായിരുന്നു. ബുധനാഴ്ച രാത്രി സുനില്‍ മദ്യപിച്ചെത്തുകയും വഴക്കുണ്ടാക്കുകയും ചെയ്തിരുന്നതായാണ് വിവരം. യുവതി രാത്രി മറ്റൊരാളുമായി ഫോണില്‍ സംസാരിച്ചതാണ് പ്രകോപനത്തിന് കാരണമായതെന്നാണ് സുനില്‍ പോലിസിന് മൊഴി നല്‍കിയത്. കസ്റ്റഡിയിലുളള സുനിലിനെ ചോദ്യം ചെയ്ത് വരുകയാണ്.