കോട്ടയം നീലിമംഗലം പാലം കലക്ടര്‍ സന്ദര്‍ശിച്ചു; അറ്റകുറ്റപ്പണി അടിയന്തരമായി പൂര്‍ത്തീകരിക്കാന്‍ നിര്‍ദേശം

കോട്ടയം: നീലിമംഗലം പാലം ജില്ലാ കലക്ടര്‍ ഡോ. പി കെ ജയശ്രീ സന്ദര്‍ശിച്ചു. പാലത്തിലെ സ്ട്രിപ്പ് സീലിന്റെ അറ്റകുറ്റപ്പണി രണ്ടുദിവസത്തിനുള്ളില്‍ അടിയന്തരമായി പൂര്‍ത്തീകരിക്കാന്‍ പൊതുമരാമത്ത് വകുപ്പ് പാലം വിഭാഗം എക്‌സിക്യൂട്ടീവ് എന്‍ജിനീയര്‍ക്ക് നിര്‍ദേശം നല്‍കി.

അറ്റകുറ്റപ്പണിയുമായി ബന്ധപ്പെട്ട് ഗതാഗതക്രമീകരണത്തിന് പോലിസിനെയും മോട്ടോര്‍വാഹന വകുപ്പിനെയും ചുമതലപ്പെടുത്തി. അറ്റകുറ്റപ്പണിയുടെ ഭാഗമായി ആവശ്യമെങ്കില്‍ പഴയ പാലത്തിലൂടെ ഗതാഗതം തിരിച്ചുവിടാനും നിര്‍ദ്ദേശിച്ചു. സ്ട്രിപ്പ് സീല്‍ എത്തിക്കുന്നതിന് കരാറുകാരന് നിര്‍ദ്ദേശം നല്‍കിയിട്ടുണ്ടെന്നും ചൊവ്വാഴ്ച അറ്റകുറ്റപ്പണി പൂര്‍ത്തീകരിക്കാന്‍ കഴിയുമെന്നും എക്‌സിക്യൂട്ടീവ് എന്‍ജിനീയര്‍ സിസിലി ജോസഫ് പറഞ്ഞു.