മൃതദേഹവുമായി വരികയായിരുന്ന ആംബുലന്‍സ് ഉള്‍പ്പെടെ മൂന്ന് വാഹനങ്ങള്‍ കൂട്ടിയിടിച്ചു; എട്ടുപേര്‍ക്ക് പരിക്ക്

പഴയങ്ങാടി: കണ്ണൂര്‍ എയര്‍പോര്‍ട്ടില്‍നിന്ന് മൃതദേഹവുമായി വരികയായിരുന്ന ആംബുലന്‍സും പിക് അപ്പ് വാനും കാറും കൂട്ടിയിടിച്ച് എട്ടുപേര്‍ക്ക് പരിക്കേറ്റു. ആംബുലന്‍സ് ഡ്രൈവര്‍ കാസര്‍കോഡ് ഉദുമ സ്വദേശി ശ്രീജിത് (42), സഹോദരന്‍ ബാബുരാജ് (35), വിദേശത്തുനിന്ന് മൃതദേഹത്തോടൊപ്പം ആംബുലന്‍സില്‍ യാത്ര ചെയ്തിരുന്ന രവീന്ദ്രന്‍ (40), ഇയാളുടെ ഭാര്യ, ബന്ധുക്കളായ മൂന്നുപേര്‍, പിക് അപ്പ് വാന്‍ ഡ്രൈവര്‍ പടന്നപ്പാലം സ്വദേശി ഷെയ്ഖ് അലി (50), മകന്‍ അബ്ദുല്‍ ഖാദര്‍ (29) എന്നിവര്‍ക്കാണ് പരിക്കേറ്റത്.

ഇന്ന് രാവിലെ 11.30 ഓടെ കെഎസ്പിടി റോഡില്‍ അടുത്തില ഇറക്കത്തിലാണ് ആംബുലന്‍സ് ഉള്‍പ്പെടെ മൂന്ന് വാഹനങ്ങള്‍ കൂട്ടിയിടിച്ചത്. പരിക്കേറ്റവരെ പരിയാരത്തെ കണ്ണൂര്‍ ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ആംബുലന്‍സ് ഡ്രൈവറുടെയും പിക് അപ്പ് വാന്‍ ഡ്രൈവറുടെയും നില ഗുരുതരമാണ്.

ഗള്‍ഫില്‍നിന്നും ഉദുമ സ്വദേശിയായ രവീന്ദ്രന്റെ ഭാര്യ ബന്ധു സുധീഷിന്റെ മൃതദേഹവുമായി വിമാനത്താവളത്തില്‍നിന്ന് ഉദുമയിലെ വീട്ടിലേക്കുള്ള യാത്രാമധ്യേയാണ് അപകടമുണ്ടായത്. വിവരമറിഞ്ഞ് പഴയങ്ങാടി പോലിസ് സ്ഥലത്തെത്തിയിരുന്നു. വാഹനങ്ങള്‍ റോഡില്‍നിന്ന് നീക്കിയിട്ടുണ്ട്.