അധികാരത്തിലിരിക്കുന്നത് ഏത് സർക്കാരായാലും വിമർശിക്കാൻ അവകാശമുണ്ട് സുപ്രിം കോടതി ജഡ്ജി ദീപക് ഗുപ്ത

ന്യൂഡൽഹി: സർക്കാരിനെ വിമർശിക്കാൻ ഇന്ത്യൻ പൗരന്മാർക്ക് അവകാശമുണ്ടെന്ന് സുപ്രിം കോടതി ജഡ്ജി ജസ്റ്റിസ് ദീപക് ഗുപ്ത. ഇത്തരം വിമർശനങ്ങൾ രാജ്യദ്രോഹമായി കണക്കാക്കാനാവില്ലെന്നും അദ്ദേഹം പറഞ്ഞു. അഹമ്മദാബാദിൽ ഒരു ചാരിറ്റബിൾ ട്രസ്റ്റ് സംഘടിപ്പിച്ച അഭിഭാഷകരുടെ ശില്പശാലയിൽ സംസാരിക്കുകയായിരുന്നു അദ്ദേഹം.

തൻറെ അഭിപ്രായങ്ങൾ വ്യക്തിപരമാണെന്നും സുപ്രീംകോടതി ജഡ്ജിയെന്ന നിലയിൽ തന്റെ ഔദ്യോഗിക ശേഷിയിലല്ലെന്നും ഗുപ്ത പറഞ്ഞു. എക്സിക്യൂട്ടീവ്, ജുഡീഷ്യറി, ബ്യൂറോക്രസി, സായുധ സേന എന്നിവയെ വിമർശിച്ചാൽ രാജ്യദ്രോഹമെന്ന് വിശേഷിപ്പിക്കാനാവില്ല . ഈ സ്ഥാപനങ്ങളെക്കുറിച്ചുള്ള വിമർശനങ്ങൾ നമ്മൾ എതിർക്കുകയാണെങ്കിൽ, ജനാധിപത്യ രാഷ്ട്രത്തിന് പകരം ഒരു പോലിസ് രാഷ്ട്രമായി മാറും."

എന്നെ സംബന്ധിച്ചിടത്തോളം, ഭരണഘടനയിൽ വ്യക്തമാക്കാത്ത വളരെ പ്രധാനപ്പെട്ട ഒരു അവകാശമുണ്ട്.. അഭിപ്രായ സ്വാതന്ത്ര്യത്തിനുള്ള അവകാശം, മനസാക്ഷി സ്വാതന്ത്ര്യത്തിനുള്ള അവകാശം, ഏറ്റവും പ്രധാനപ്പെട്ട അവകാശം വിയോജിപ്പിനുള്ള അവകാശമാണ്. പരമ്പരാഗത നിയമങ്ങളിൽ ഉറച്ചു നിൽക്കുന്ന ഒരു സമൂഹം അധപതിക്കുമെന്നും അദ്ദേഹം കൂട്ടിച്ചേർത്തു.

സമൂഹത്തിന്റെ സ്വീകാര്യമായ മാനദണ്ഡങ്ങളോട് വിയോജിക്കുമ്പോഴാണ് പുതിയ ചിന്തകർ ജനിക്കുന്നത്. എല്ലാവരും നന്നായി ചവിട്ടിയ പാത പിന്തുടരുകയാണെങ്കിൽ, പുതിയ പാതകളൊന്നും സൃഷ്ടിക്കപ്പെടില്ല, മനസ്സിന്റെ പുതിയ കാഴ്ചകളൊന്നും കണ്ടെത്താനാവില്ല. "എന്തുകൊണ്ട്" എന്ന് എപ്പോഴും ചോദ്യം ചെയ്യണം, അപ്പോൾ മാത്രമേ സമൂഹം വികസിക്കുകയുള്ളൂവെന്നും അദ്ദേഹം പറഞ്ഞു.

ഇന്ത്യയെപ്പോലുള്ള ഒരു മതേതര രാജ്യത്ത് നിരീശ്വരവാദികൾക്കും അവിശ്വാസികൾക്കും വിശ്വാസികൾക്കും അഭിപ്രായ സ്വാതന്ത്ര്യത്തിനുള്ള അവകാശമുണ്ടെന്ന് ഗുപ്ത പറഞ്ഞു. 1975 ൽ അടിയന്തരാവസ്ഥയിൽ തടവിലാക്കപ്പെട്ടവരുമായി ബന്ധപ്പെട്ട കേസിൽ ജഡ്ജി എച്ച് ആർ ഖന്ന പ്രകടിപ്പിച്ച വിയോജിപ്പിനെക്കുറിച്ച് ജഡ്ജി സദസ്സിനെ ഓർമ്മിപ്പിച്ചു.

അധികാരത്തിലിരിക്കുന്ന സർക്കാരിനെ അതേത് സർക്കാരായിരുന്നാലും വിമർശിക്കാൻ ഞങ്ങൾക്ക് അവകാശമുണ്ട്. രാജ്യദ്രോഹ നിയമത്തിൻറെ ദുരുപയോഗം നമ്മുടെ സ്വാതന്ത്ര്യസമരസേനാനികൾ പോരാടിയ തത്വത്തിന് വിരുദ്ധമാണ്. ജുഡീഷ്യറി പോലും വിമർശനത്തിന് അതീതമല്ലെന്നും സ്വന്തം പ്രവർത്തനങ്ങളെ കുറിച്ച് ആത്മപരിശോധന നടത്തണമെന്നും ഗുപ്ത കൂട്ടിച്ചേർത്തു.