യുജിസി സമത്വ നിയമങ്ങള്‍ക്കെതിരായ കോലാഹലം ഹിന്ദുത്വ ഇരവാദ രാഷ്ട്രീയത്തിലെ പുതിയ വഴിത്തിരിവ്

അജോയ് ആശിര്‍വാദ് മഹാപ്രശസ്ത

ന്യൂഡൽഹി: യൂണിവേഴ്സിറ്റി ഗ്രാന്റ്സ് കമ്മീഷൻ (യുജിസി) പുതുതായി രൂപപ്പെടുത്തിയ സമത്വ നിയമങ്ങളെച്ചൊല്ലിയുള്ള സമീപകാല കോലാഹലങ്ങൾ ഹിന്ദുത്വ രാഷ്ട്രീയത്തിൽ ഒരു പുതിയ വഴിത്തിരിവ്. 11 വർഷമായി, രാജ്യത്തെ ജനസംഖ്യയുടെ ഏകദേശം 80 ശതമാനം വരുന്ന ഭൂരിപക്ഷ സമൂഹമായ ഹിന്ദുക്കൾ സ്വതന്ത്ര ഇന്ത്യയിൽ അവഗണിക്കപ്പെട്ടിരിക്കുന്നു എന്ന മിഥ്യാധാരണ സംഘപരിവാരം അരക്കിട്ടുറപ്പിക്കുകയായിരുന്നു. ഈ ആഖ്യാനത്തിനെതിരേ ധാരാളം തെളിവുകൾ ഉണ്ടായിരുന്നിട്ടും ഹിന്ദുക്കളെ ദുർബലരായി ആവർത്തിച്ച് ചിത്രീകരിക്കുന്നത് സംഘപരിവാരം തുടർന്നു.

അനിശ്ചിതമായ ഒരു ഭാവിയിൽ മുസ്‌ലിംകൾ എണ്ണത്തിൽ കൂടുതലാകുമെന്ന ഭയം മുതൽ സാമ്പത്തികവും സാംസ്കാരികവുമായ വിഭവങ്ങൾ നഷ്ടപ്പെടുകയും അവ മുസ്‌ലിംകളിലേക്ക് ചെന്നെത്തുകയും ചെയ്യുമെന്ന ആശങ്കകൾ ഉൾപ്പെടെയുള്ള ഹിന്ദുത്വ പ്രചാരണം ഹിന്ദുക്കൾക്കിടയിൽ വ്യാപകമായ ഭീതി സൃഷ്ടിച്ചിട്ടുണ്ട്. നരേന്ദ്ര മോദിയുടെ സഹായത്തോടെ ആർഎസ്എസ്, അവരുടെ ഭാഷ്യം അനുസരിച്ച് ഇരവൽക്കരിക്കപ്പെട്ട ഹിന്ദുക്കളെക്കുറിച്ച് വിപുലമായ ഒരു ആഖ്യാനം മെനഞ്ഞെടുത്തു. അവരുടെ അഭിപ്രായത്തിൽ ന്യൂനപക്ഷ പ്രീണനത്തിൽ ഏർപ്പെട്ടിരുന്ന പ്രതിപക്ഷ പാർട്ടികളാണ് ഇക്കാര്യത്തിൽ കുറ്റക്കാർ.

ജാതി അടിസ്ഥാനത്തിലുള്ള സമത്വ തത്ത്വങ്ങളിൽ സ്ഥാപിതമായ, മണ്ഡല്‍ അല്ലെങ്കിൽ ദ്രാവിഡ സാമൂഹിക നീതി രാഷ്ട്രീയം പിന്തുടരുന്ന രാഷ്ട്രീയ പാർട്ടികളെ അവർ ജാതിവാദികളായി മുദ്രകുത്തി. ഭരണകക്ഷിയായ ബിജെപി, രാഷ്ട്രീയ ഏകീകരണത്തിനുള്ള ഒരു ഉപകരണം എന്ന നിലയിൽ ഹിന്ദു മത സ്വത്വത്തിന്റെ ഉപയോഗം സാധാരണവൽക്കരിക്കുകയും 'ഹിന്ദു ഐക്യം' ഒരു നിയമാനുസൃത ലക്ഷ്യമായി അവതരിപ്പിക്കുകയും ചെയ്തപ്പോഴും, "വോട്ട് ബാങ്ക് രാഷ്ട്രീയം", "തുഷ്ടികരൺ" അഥവാ പ്രീണനം തുടങ്ങിയ പദങ്ങൾ അധിക്ഷേപകരമായി ഉപയോഗിക്കുന്നത് പതിവാക്കി.

ആർക്കാണ് പ്രത്യേകാവകാശം, ആരാണ് പിന്നാക്കം എന്ന ആഖ്യാനം, ഹിന്ദു ഭൂരിപക്ഷ രാഷ്ട്രം കെട്ടിപ്പടുക്കുക എന്ന ലക്ഷ്യം മുന്നോട്ടു കൊണ്ടുപോകുന്നതിനായി ആർഎസ്എസ് വിജയകരമായി മാറ്റിമറിച്ചു. ദലിതർ, മുസ്‌ലിംകൾ, ആദിവാസികൾ തുടങ്ങിയ ദുർബല വിഭാഗങ്ങൾക്കായി മുൻ സർക്കാരുകൾ സ്വീകരിച്ച നടപടികൾ "വോട്ട് ബാങ്ക്" രാഷ്ട്രീയമായി വളച്ചൊടിക്കുകയും ദേശീയ പുരോഗതിക്ക് ഹാനികരമാണെന്ന് ചിത്രീകരിക്കുകയും ചെയ്തു. ന്യൂനപക്ഷങ്ങൾക്കും മറ്റ് പാർശ്വവൽക്കരിക്കപ്പെട്ട സമൂഹങ്ങൾക്കും ഉയർച്ചയ്ക്കുള്ള വഴികൾ സൃഷ്ടിക്കുന്ന ക്ഷേമ നയങ്ങൾ നിരന്തരമായി പരിഹസിക്കപ്പെട്ടു.

ദുർബല വിഭാഗങ്ങളെ സാമൂഹിക മുഖ്യധാരയിലേക്ക് കൊണ്ടുവരുന്നതിനുള്ള നിശ്ചയദാർഢ്യത്തോടെയുള്ള നടപടികൾ ആഗോള തലത്തിൽ മനസ്സിലാക്കപ്പെടുന്നതിൽ നിന്ന് വ്യത്യസ്തമായി മോദിയുടെ നേതൃത്വത്തിലുള്ള ഇന്ത്യയിൽ പ്രീണനമായി പുനർനിർമിക്കപ്പെട്ടു. മുസ്‌ലിംകളെയും ദലിതരെയും ആദിവാസികളെയും ബാധിക്കുന്ന മോശം മാനവ വികസന സൂചികകളിൽനിന്ന് വലിയതോതിൽ വിച്ഛേദിക്കപ്പെട്ട ഒരു പ്രചാരണത്തിന് ബിജെപി ഉപയോഗിക്കുന്ന മാധ്യമങ്ങളും പിആർ സംവിധാനങ്ങളും സജീവമായി സഹായകരമാകുകയാണ്. പകരം, ഹിന്ദുക്കളാണ് ഇരകളെന്ന വിവരണവും അവകാശവാദങ്ങളും ബിജെപിയുടെ വിജയകരമായ തിരഞ്ഞെടുപ്പ് തന്ത്രമായി മാറിയിരിക്കുന്നു.

എന്നിരുന്നാലും, സാമൂഹിക, രാഷ്ട്രീയ, സാമ്പത്തിക ശക്തികൾ പ്രയോഗിക്കുന്ന ഹിന്ദുക്കൾക്കിടയിലെ ഈ സാങ്കൽപ്പിക ഇരകളുടെ സങ്കീർണത ഇപ്പോൾ പാർട്ടിയുടെ നിയന്ത്രണത്തിനപ്പുറത്തേക്ക് വളർന്നിരിക്കുന്നു. തുല്യതാ നിയമങ്ങളെച്ചൊല്ലി ഉയർന്ന ജാതി ഗ്രൂപ്പുകൾ എന്ന് വിളിക്കപ്പെടുന്നവരുടെ പ്രതിഷേധങ്ങൾ അതാണ് സൂചിപ്പിക്കുന്നത്.

വാസ്തവത്തിൽ, ഹിന്ദു ഇരകളെക്കുറിച്ചുള്ള ഈ വിവരണങ്ങളിലെ ഒന്നും തന്നെ വസ്തുതാപരമല്ല. ഇന്ത്യയുടെ ദേശീയ വിഭവങ്ങളിൽ ഭൂരിഭാഗവും ഹിന്ദുക്കൾ നിയന്ത്രിക്കുകയും ഗണ്യമായ സാമൂഹിക, സാമ്പത്തിക, രാഷ്ട്രീയ ശക്തി കൈവശപ്പെടുത്തുകയുമാണ് ചെയ്യുന്നത്. സാമൂഹിക-സാമ്പത്തിക സൂചികകളിൽ, ഹിന്ദുക്കൾ, പ്രത്യേകിച്ച് വരേണ്യ ജാതികളിലെയും ഇടത്തരം സമൂഹങ്ങളിലെയും അംഗങ്ങൾ, ന്യൂനപക്ഷങ്ങളേക്കാൾ മികച്ച സ്ഥാനത്താണ്. ഇതിനു വിപരീതമായി, ദലിതരും ആദിവാസികളും സാമൂഹികവും സാമ്പത്തികവുമായ പ്രാതിനിധ്യത്തിലും വിഭവങ്ങളുടെ ലഭ്യതയിലും വളരെ പിന്നിലാണ്.

2019ൽ പ്രസിദ്ധീകരിച്ച സാവിത്രിഭായ് ഫൂലെ പൂനെ സർവകലാശാല (എസ്‌പി‌പി‌യു), ജവഹർലാൽ നെഹ്‌റു സർവകലാശാല (ജെ‌എൻ‌യു), ഇന്ത്യൻ ഇൻസ്റ്റിറ്റ്യൂട്ട് ഓഫ് ദലിത് സ്റ്റഡീസ് എന്നിവ സംയുക്തമായി നടത്തിയ രണ്ട് വർഷത്തെ പഠനത്തിൽ വ്യക്തമായ അസമത്വങ്ങളാണ് വെളിപ്പെടുന്നത്. ഹിന്ദുക്കളിൽ 22.3 ശതമാനം മാത്രം ഉൾപ്പെടുന്ന ഉയർന്ന ജാതി ഗ്രൂപ്പുകൾക്ക് രാജ്യത്തിന്റെ സമ്പത്തിന്റെ 41 ശതമാനം ഉണ്ട്. ഇത് അവരെ ഏറ്റവും സമ്പന്ന വിഭാഗമാക്കി മാറ്റുന്നു. ഹിന്ദു ജനസംഖ്യയുടെ 50 ശതമാനത്തിലധികം വരുന്ന മറ്റ് പിന്നാക്ക വിഭാഗങ്ങൾ സ്വത്തുക്കളുടെ 30.7 ശതമാനം മാത്രമേ നിയന്ത്രിക്കുന്നുള്ളൂ.

ഇന്ത്യയിലെ ജനസംഖ്യയുടെ ഏകദേശം 17 ശതമാനം വരുന്ന ദലിതർക്ക് 7.6 ശതമാനം ആസ്തികൾ മാത്രമേ ഉള്ളൂ. അതേസമയം, ജനസംഖ്യയുടെ ഏകദേശം 9 ശതമാനം വരുന്ന ആദിവാസികൾ 3.7 ശതമാനം മാത്രമേ നിയന്ത്രിക്കുന്നുള്ളൂ. ജനസംഖ്യയുടെ 14.2 ശതമാനം വരുന്ന മുസ്‌ലിംകൾക്ക് 8 ശതമാനം ആസ്തികൾ മാത്രമേ കൈവശമുള്ളൂ.

ഭൂരിപക്ഷവാദപരമായ ആഖ്യാനം പ്രധാനമായും സംഘപരിവാരത്തിന്റെ വരേണ്യ-ജാതി പിന്തുണക്കാരാണ് നയിക്കുന്നത്. ഭരണകാലത്ത് കൂടുതൽ വിഭവങ്ങളുടെ വിഹിതം നേടാനുള്ള അവസരം കാണുന്നത് ഈ സവർണ-ഇടത്തരം ജാതി ഗ്രൂപ്പുകളാണ്. നിലവിലുള്ള സാമ്പത്തിക അനിശ്ചിതത്വങ്ങളും സാമൂഹിക ഉൽക്കണ്ഠകളും കാരണം ഈ ആവശ്യങ്ങൾ ശക്തമായി.

മോദിയുടെ കീഴിൽ മുസ്‌ലിംകളുടെ 'അന്യത്വം' ഏതാണ്ട് പൂർത്തിയായി. ബിജെപി ഭരിക്കുന്ന സംസ്ഥാനങ്ങൾക്ക് സംസ്ഥാന അസംബ്ലികളിൽ മുസ്‌ലിം പ്രാതിനിധ്യം വളരെ കുറവാണ്. പ്രതിപക്ഷം ഭരിക്കുന്ന സംസ്ഥാനങ്ങളിൽ പോലും, പ്രബലമായ മത ധ്രുവീകരണം കാരണം മുസ്‌ലിം പ്രാതിനിധ്യം കുത്തനെ കുറഞ്ഞു.

മുസ്‌ലിംകൾ ഇതിനകം അരികുവൽക്കരിക്കപ്പെട്ടതിനാൽ, പ്രധാനമായും സവർണ ഗ്രൂപ്പുകളുടെ നേതൃത്വത്തിലുള്ള ഹിന്ദുത്വ പാദസേവകർ ഇപ്പോൾ ദലിതരുടെയും ആദിവാസികളുടെയും ഭരണഘടനാപരമായ അവകാശങ്ങൾ ലക്ഷ്യമിടുന്നു. അവരെയാണ് അടുത്ത ദുർബല വിഭാഗമായി അവർ കാണുന്നത്.

ബിജെപിയുടെ ഹിന്ദു ഏകീകരണ തന്ത്രത്തിന്റെ വലിയൊരു ഭാഗം, വർഷങ്ങളായി അവർ വഹിച്ചിരുന്ന "ഉയർന്ന ജാതി" പ്രതിച്ഛായ, "ബ്രാഹ്മണ-ബനിയ" അസോസിയേഷൻ എന്ന ലേബൽ എന്നിവ ഇല്ലാതാക്കുന്നതിനെ ആശ്രയിച്ചായിരുന്നു. മോദി പ്രധാനമന്ത്രിയായതിനുശേഷം, അദ്ദേഹം തന്റെ ഒബിസി ഐഡന്റിറ്റി ഉയർത്തിക്കാട്ടുകയും, ബിജെപിക്കുള്ളിലും ഭരണഘടനാപരമായ സ്ഥാനങ്ങളിലും ഒബിസി, ദലിതർ, ആദിവാസികൾ എന്നിവരെ ഉൾപ്പെടുത്തി പ്രാതിനിധ്യം വികസിപ്പിക്കുകയും ചെയ്തു. തൽക്ഷണ തിരഞ്ഞെടുപ്പ് നേട്ടങ്ങൾക്കായി, സ്വന്തം സംഖ്യാ ശക്തി വർധിപ്പിക്കാൻ ശ്രമിക്കുന്നതിനായി ബിജെപി ദുർബല സമൂഹങ്ങളെ പരസ്പരം എതിർത്തു. എന്നിരുന്നാലും, ഒബിസികളിലും ദലിതരിലും തിരഞ്ഞെടുപ്പ് ശ്രദ്ധ കേന്ദ്രീകരിക്കുന്നത് മൂലം അവരുടെ വിശ്വസ്തരായ ഉയർന്ന ജാതി അനുയായികളെ അവഗണിക്കുകയും ശ്രദ്ധയിൽപ്പെടാതിരിക്കുകയും ചെയ്യുന്നതായ തോന്നലുണ്ടാക്കി.

കാലാകാലങ്ങളിൽ, പ്രധാനമന്ത്രിക്ക് തുടക്കം മുതൽ തന്റെ പാർട്ടിയോട് വിശ്വസ്തരായ ഉയർന്ന ജാതി ഗ്രൂപ്പുകൾക്കിടയിലുള്ള ഉൽക്കണ്ഠകൾ ശമിപ്പിക്കേണ്ടിവന്നു.

ദലിതർക്കും ആദിവാസികൾക്കും സംവരണം നൽകുന്നതിനെ എതിർത്ത ആർ‌എസ്‌എസും അതിന്റെ അനുബന്ധ സംഘടനകളും സമീപ ദശകങ്ങളിൽ ജാതിയേക്കാൾ സാമ്പത്തിക മാനദണ്ഡങ്ങളെ അടിസ്ഥാനമാക്കിയുള്ള സംവരണത്തിനായി വാദിക്കുന്നതിലേക്ക് നിലപാട് മാറ്റി. അതനുസരിച്ച്, അദ്ദേഹത്തിന്റെ സർക്കാരിന്റെ ഏറ്റവും പ്രധാനപ്പെട്ട നടപടികളിലൊന്ന് സാമ്പത്തികമായി പിന്നാക്കം നിൽക്കുന്ന വിഭാഗങ്ങൾക്ക് 10 ശതമാനം ഇഡബ്ല്യുഎസ് സംവരണം നടപ്പിലാക്കുക എന്നതായിരുന്നു. ജോലികളിലും വിദ്യാഭ്യാസ സ്ഥാപനങ്ങളിലും താഴ്ന്ന വരുമാനക്കാരായ ഉയർന്ന ജാതി ഹിന്ദു കുടുംബങ്ങൾക്ക് സംവരണ ക്വാട്ട ഫലപ്രദമായി അവതരിപ്പിച്ചു. ഈ നയം നിലവിലുള്ള ക്വാട്ടയിൽ ഉൾപ്പെടുത്തിയിരുന്ന ദലിതർ, ആദിവാസികൾ, മറ്റ് ദുർബല വിഭാഗങ്ങൾ എന്നിവരെ ഫലത്തിൽ ഒഴിവാക്കുന്നതായി.

ആർ‌എസ്‌എസ് വൃത്തങ്ങളിൽ, ഉയർന്ന ജാതിക്കാരുടെ ദീർഘകാല ആവശ്യങ്ങൾ നിറവേറ്റുന്നതിനായി ഇഡബ്ല്യുഎസ് സംവരണം നിശ്ശബ്ദമായി ആഘോഷിക്കപ്പെട്ടതായി യുജിസി നിയമങ്ങൾക്കെതിരായ പ്രതിഷേധ കോലാഹലങ്ങൾക്കിടയിൽ ബിഹാർ ബിജെപി പ്രസിഡന്റ് സഞ്ജയ് സരോഗി ഊന്നിപ്പറഞ്ഞു. ഇഡബ്ല്യുഎസ് ക്വാട്ട തെളിവായി ചൂണ്ടിക്കാട്ടി മോദി സർക്കാർ സവർണ താൽപ്പര്യങ്ങൾ സംരക്ഷിക്കുമെന്നും സരോഗി ഉറപ്പിച്ചു പറഞ്ഞു.

മോദി നയിക്കുന്ന ബിജെപി വളർത്തിയെടുത്ത ഇരഹിന്ദുത്വ രാഷ്ട്രീയം ഇപ്പോൾ തിരിഞ്ഞു കുത്തുകയാണ്. മുസ്‌ലിംകളുടെ വിജയകരമായ പാർശ്വവൽക്കരണം കണ്ട ഉയർന്ന ജാതി ഗ്രൂപ്പുകൾ, സ്വന്തം താൽപ്പര്യങ്ങൾ മുന്നോട്ട് കൊണ്ടുപോകാൻ അവർ തന്നെ പ്രോൽസാഹിപ്പിച്ച ഒരു സംവിധാനത്തെക്കുറിച്ച് ഇപ്പോൾ പരാതികൾ ഉന്നയിക്കുന്നു.

സർക്കാർ ഒഴിവുകൾ നികത്താനോ നിയമനങ്ങൾക്കായി ന്യായമായ പരീക്ഷകൾ നടത്താനോ ചോദ്യക്കടലാസ് ചോർച്ച തടയാനോ ഇന്ത്യയിലുടനീളം വ്യാപിച്ച പരീക്ഷാ മാഫിയയെ നിയന്ത്രിക്കാനോ ബിജെപി ഭരിക്കുന്ന സർക്കാരിന് കഴിയാത്തതിനെതിരേ ഈ പ്രതിഷേധക്കാർ ബിജെപി സർക്കാരിന്റെ നിലപാടുകളെ വെല്ലുവിളിക്കുന്നില്ല. പകരം, വിദ്യാഭ്യാസത്തിലും തൊഴിലിലും ജാതി അടിസ്ഥാനമാക്കിയുള്ള സംവരണത്തിനെതിരായ എതിർപ്പിന്റെ രൂപമെടുത്തിരിക്കുന്ന യുജിസിയുടെ ഇക്വിറ്റി നിയമങ്ങൾക്കെതിരേയാണ് അവർ പ്രതിഷേധിക്കുന്നത്. പ്രകടനക്കാർ നടത്തിയ പ്രസ്താവനകളിൽ ഇത് വ്യക്തമാണ്.

ഈ പ്രതിഷേധങ്ങൾ ദീർഘകാലമായി നിലനിൽക്കുന്ന ഉയർന്ന ജാതിക്കാരുടെ വിദ്വേഷത്തിന്റെ തുടക്കത്തിന്റെ സൂചനയായിരിക്കാം. ഉദാഹരണത്തിന്, പിന്നാക്ക വിഭാഗങ്ങളിൽനിന്നുള്ള നേതാവായ വിദ്യാഭ്യാസ മന്ത്രി ധർമേന്ദ്ര പ്രധാൻ, വരേണ്യ സ്വത്വ നിരാശയുടെ സൗകര്യപ്രദമായ ലക്ഷ്യമായി മാറിയിരിക്കുന്നു. രാഷ്ട്രീയ ഇളവുകൾ നൽകി പ്രതിഷേധക്കാരെ സമാധാനിപ്പിക്കാൻ പ്രധാനമന്ത്രി ഇടപെടാൻ തീരുമാനിച്ചേക്കാം. പക്ഷേ, അത് ബിജെപിയുടെ രാഷ്ട്രീയത്തിന് അടിവരയിടുന്ന ആഴത്തിൽ വേരൂന്നിയ വിശ്വാസത്തെ മാറ്റില്ല. ഒരു ഗ്രൂപ്പിന്റെ വിജയം മറ്റൊരു ഗ്രൂപ്പിന്റെ പരാജയത്തിന്റെ ചെലവിൽ മാത്രമേ ഉണ്ടാകൂ എന്നതാണ് ആ വിശ്വാസം.

കടപ്പാട്: ദ വയർ