ദുരിതാശ്വാസ ഫണ്ട് വിനിയോഗം: മുഖ്യമന്ത്രിക്കും മന്ത്രിമാര്‍ക്കും ലോകായുക്ത നോട്ടീസ്
കേസില്‍ മുഖ്യമന്ത്രിക്കും മന്ത്രിമാര്‍ക്കും അടക്കം 17 പേര്‍ക്ക് നോട്ടീസ് അയയ്ക്കാനും ലോകായുക്ത ഉത്തരവിട്ടു. അടുത്ത മാസം 15 ന് ഹാജരാവാനാവശ്യപ്പെട്ടാണ് നോട്ടീസ്.
തിരുവനന്തപുരം: മുഖ്യമന്ത്രിയുടെ ദുരിതാശ്വാസ ഫണ്ട് ദുര്‍വിനിയോഗം ചെയ്തുവെന്ന ഹരജി ലോകായുക്ത ഫുള്‍ ബഞ്ച് ഫയലില്‍ സ്വീകരിച്ചു. കേസില്‍ മുഖ്യമന്ത്രിക്കും മന്ത്രിമാര്‍ക്കും അടക്കം 17 പേര്‍ക്ക് നോട്ടീസ് അയയ്ക്കാനും ലോകായുക്ത ഉത്തരവിട്ടു. അടുത്ത മാസം 15 ന് ഹാജരാവാനാവശ്യപ്പെട്ടാണ് നോട്ടീസ്. മുന്‍ കേരള സര്‍വകലാശാല ജീവനക്കാരനായ ആര്‍ എസ് ശശികുമാര്‍ നല്‍കിയ പരാതിയിലാണ് ജസ്റ്റിസ് പയസ് സി കുര്യാക്കോസിന്റെ നേതൃത്വത്തിലുള്ള ഫുള്‍ബെഞ്ച് നടപടികളിലേക്ക് കടന്നത്. ദുരിതാശ്വാസ നിധിയിലെ തുകയില്‍ അഴിമതിയും സ്വജനപക്ഷപാതവും നടത്തി മുഖ്യമന്ത്രി ദുര്‍വിനിയോഗം നടത്തി.
അന്തരിച്ച എന്‍സിപി നേതാവ് ഉഴവൂര്‍ വിജയന്റെ കുടുംബത്തിന് മുഖ്യമന്ത്രിയുടെ ദുരിതാശ്വാസഫണ്ടില്‍നിന്ന് ധനസഹായം അനുവദിച്ചതും മുന്‍ ചെങ്ങന്നൂര്‍ എംഎല്‍എ കെ കെ രാമചന്ദ്രന്‍നായരുടെ വായ്പകള്‍ തിരിച്ചടയ്ക്കാന്‍ പണമനുവദിച്ചതും അഴിമതിയാണെന്നും നിയമലംഘനമാണെന്നും ചൂണ്ടിക്കാട്ടിയാണ് ശശികുമാര്‍ പരാതി നല്‍കിയത്. ഇതിനുപുറമെ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ സുരക്ഷാ ചുമതലയുണ്ടായിരുന്ന സിവില്‍ പോലിസ് ഓഫിസര്‍ പ്രവീണിന്റെ കുടുംബത്തിന് ധനസഹായം നല്‍കിയതും പരാതിയില്‍ ചൂണ്ടിക്കാണിച്ചിട്ടുണ്ട്.