ട്വന്റി20 ലോകകപ്പ്: ഷാഹിദ് അഫ്രീദി അംബാസഡര്‍

വാഷിങ്ടണ്‍: ജൂണ്‍ രണ്ടുമുതല്‍ അമേരിക്കയില്‍ നടക്കുന്ന ഐസിസി ട്വന്റി 20 പുരുഷ ലോകകപ്പ് ക്രിക്കറ്റ് ടൂര്‍ണമെന്റിന്റെ അംബാസഡറായി പാകിസ്താന്‍ മുന്‍ താരം ഷാഹിദ് അഫ്രിദിയെ തിരഞ്ഞെടുത്തു. ഇന്ത്യയുടെ യുവരാജ് സിംഗ്, വെസ്റ്റ് ഇന്‍ഡീസിന്റെ ക്രിസ് ഗെയ്ല്‍, സ്പ്രിന്റ് ഇതിഹാസം ഉസൈന്‍ ബോള്‍ട്ട് എന്നിവരുള്‍പ്പെടെയുള്ള അംബാസഡര്‍മാരുടെ കൂട്ടത്തിലാണ് അഫ്രീദിയെയും ഉള്‍പ്പെടുത്തിയത്. 2009ലെ പാക്കിസ്താന്റെ ടി20 ലോകകപ്പ് വിജയത്തില്‍ നിര്‍ണായക പങ്ക് വഹിച്ച താരമാണ് മുന്‍ ഓള്‍റൗണ്ടര്‍ ഷാഹിദ് അഫ്രീദി. ഐസിസിയുടെ ട്വന്റി 20 ലോകകപ്പിന്റെ ഭാഗമാവാന്‍ സാധിച്ചതില്‍ സന്തോഷമുണ്ടെന്ന് അഫ്രീദി അറിയിച്ചു. അവിടെ മുമ്പത്തേക്കാള്‍ കൂടുതല്‍ ടീമുകളും കൂടുതല്‍ മല്‍സരങ്ങളും കൂടുതല്‍ നാടകീയതയും ഞങ്ങള്‍ കാണുമെന്നും അദ്ദേഹം പറഞ്ഞു. 2009ല്‍ ഇംഗ്ലണ്ടില്‍ നടന്ന ടൂര്‍ണമെന്റില്‍ രണ്ട് അര്‍ധ സെഞ്ച്വറികളോടെ 140 സ്‌ട്രൈക്ക് റേറ്റില്‍ 176 റണ്‍സ് നേടിയ അഫ്രീദി പാകിസ്ഥാന് വേണ്ടി ഏറ്റവും കൂടുതല്‍ റണ്‍സ് നേടുന്ന രണ്ടാമത്തെ താരമായിരുന്നു. ടി20 ലോകകപ്പിന്റെ ആറ് പതിപ്പുകളില്‍ പങ്കെടുത്ത മുന്‍ പാകിസ്താന്‍ ക്യാപ്റ്റന്‍, ദക്ഷിണാഫ്രിക്കയ്‌ക്കെതിരായ സെമിഫൈനലിലും ആ വര്‍ഷം ശ്രീലങ്കയ്‌ക്കെതിരായ ഫൈനലിലും പ്ലെയര്‍ ഓഫ് ദി മാച്ച് ആയിരുന്നു.

ലോര്‍ഡ്‌സില്‍ നടന്ന ഫൈനലില്‍ 40 പന്തില്‍ പുറത്താവാതെ 54 റണ്‍സ് നേടിയ അദ്ദേഹം ശ്രീലങ്കയെ എട്ട് വിക്കറ്റിന് പരാജയപ്പെടുത്തിയാണ് ട്രോഫി സ്വന്തമാക്കിയത്. 2007ല്‍ തന്റെ ടീം ഇന്ത്യയോട് ഫൈനലില്‍ തോറ്റപ്പോളും ടൂര്‍ണമെന്റിലെ താരമായിരുന്നു അഫ്രീദി. ജൂണ്‍ 8ന് ന്യൂയോര്‍ക്കില്‍ ഇന്ത്യയ്‌ക്കെതിരായ പാകിസ്താന്റെ മല്‍സരത്തിനായി ആവേശത്തോടെ കാത്തിരിക്കുകയാണ്. ഇത് കായികരംഗത്തെ വലിയ മത്സരങ്ങളിലൊന്നാണ്. രണ്ട് മികച്ച ടീമുകള്‍ തമ്മിലുള്ള ഈ ഒഴിവാക്കാനാവാത്ത മല്‍സരത്തിന് ന്യൂയോര്‍ക്ക് ഉചിതമായ സ്ഥലമായിരിക്കുമെന്നും ഷാഹിദ് അഫ്രീദി പറഞ്ഞു.