ഗ്രീന്‍ലാന്‍ഡ് ചേര്‍ത്ത യുഎസിന്റെ ഭൂപടവുമായി ഡോണള്‍ഡ് ട്രംപ്

വാഷിങ്ടണ്‍: യൂറോപ്യന്‍ രാജ്യമായ ഡെന്‍മാര്‍ക്കിന് കീഴിലുള്ള ഗ്രീന്‍ലാന്‍ഡ് ചേര്‍ത്ത പുതിയ ഭൂപടവുമായി യുഎസ് പ്രസിഡന്റ് ഡോണള്‍ഡ് ട്രംപ്. ആര്‍ട്ടിക് ദ്വീപിനെയും കാനഡയെയും വെനുസ്വേലയെയും അമേരിക്കന്‍ പ്രദേശങ്ങളായി കാണിച്ച് നാറ്റോ (നോര്‍ത്ത് അറ്റ്‌ലാന്റിക് ട്രീറ്റി ഓര്‍ഗനൈസേഷന്‍) സഖ്യകക്ഷികളെ പരിഹസിക്കുന്ന ചിത്രമാണ് ട്രൂത്ത് സോഷ്യല്‍ പ്ലാറ്റ്ഫോമില്‍ ട്രംപ് പങ്കുവെച്ചത്. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍, ഇറ്റാലിയന്‍ പ്രധാനമന്ത്രി ജോര്‍ജിയ മെലോണി, ബ്രിട്ടീഷ് പ്രധാനമന്ത്രി കെയ്ര്‍ സ്റ്റാര്‍മര്‍, യൂറോപ്യന്‍ കമ്മിഷന്‍ അധ്യക്ഷ ഉര്‍സുല വോണ്‍ ഡെര്‍ ലെയെന്‍ തുടങ്ങിയവര്‍ ഓവല്‍ ഓഫീസില്‍ ഇരിക്കുന്നതായും പശ്ചാത്തലത്തില്‍ പുതുക്കിയ ഒരു ഭൂപടം വീക്ഷിക്കുന്നതുമായ ചിത്രമാണ് ട്രംപ് പങ്കുവെച്ചിരിക്കുന്നത്. മറ്റൊരു പോസ്റ്റില്‍, ട്രംപ് മറ്റൊരു ചിത്രം പങ്കുവെച്ചു.

അതില്‍ അദ്ദേഹം, വൈസ് പ്രസിഡന്റ് ജെഡി വാന്‍സ്, യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ എന്നിവരോടൊപ്പം ഗ്രീന്‍ലന്‍ഡില്‍ യുഎസ് പതാക ഉയര്‍ത്തുന്നതായും കാണാം. സമീപത്തെ ഒരു ബോര്‍ഡില്‍ എഴുതിയിരുന്നതിങ്ങനെ- ഗ്രീന്‍ലാന്‍ഡ്, യുഎസ് ടെറിട്ടറി, Est. 2026.